काठमाडौं २२ पौष । गण्डकी मेडिकल कलेजमा अध्ययनरत दुई विद्यार्थीको मृत्यु भएको घटनामा कास्की जिल्ला अदालतले कार चालकलाई पुर्पक्षका निम्ति थुनामा राख्ने आदेश गरेको छ ।

गएको मंसिर २४ गते कास्कीको लेखनाथस्थित अर्घौँचोकमा कारले ठक्कर दिँदा स्कुटरमा सवार २३ वर्षीया अनिशा खड्का र २४ वर्षीया भावना बरालको मृत्यु भएको थियो । खड्का पोखरा महानगरपालिका–२५, हेम्जाकी र बराल पोखरा–५, प्रस्याङमा बस्थिन् ।

कलेजमा अध्ययनपछि घर फर्कने क्रममा पोखराबाट तालचोकतर्फ जाँदै गरेको बीएए ००४१ नम्बरको कारले विपरीत दिशाबाट आउँदै गरेको ग१३प ३५७८ नम्बरको स्कुटरलाई ठक्कर दिएको थियो । कार मानबहादुर बानियाँले चलाएका थिए ।

बानियाँलाई सवारी ज्यानसम्बन्धी मुद्दामा आइतबार कास्की जिल्ला अदालतका न्यायाधीश ऋषिराम आचार्यको इजलासले पुर्पक्षका निम्ति थुनामा पठाउने आदेश दिएको हो । उक्त घटनामा डिल्लीराम बरालले कार चालक बानियाँलाई विपक्षी बनाई उजुरी दिएका थिए ।

बानियाँको थुनछेक बहस आइतबार हुने थाहा पाएपछि आरोपित रिहा हुने आशंकामा मृतकका आफन्तले अदालतबाहिर नाराबाजी गरेका थिए । आरोपितलाई रिहा नगर्न नहुने माग गदै मृतकका आफन्त, आमा समूह, क्लब तथा स्थानीयले अदालतबाहिर प्रदर्शन गरेका हुन् ।