काठमाडौं २४ पौष । ख्तियार दुरुपयोग अनुसन्धान अयोगले काठमाडौंको बूढानिलकण्ठ नगरपालिकामा कार्यरत सव–इन्जिनियर टिकाराज राईसमेत दुईजनाविरुद्ध भ्रष्टाचार मुद्दा दायर गरेको छ ।

उनीहरूले सेवाग्राहीसँग घुस लिई भ्रष्टाचार गरेको ठहर गर्दै अख्तियारले मंगलबार विशेष अदालत काठमाडौंमा मुद्दा दायर गरेको हो ।

अख्तियारले मुद्दा दायर गरेका अर्का व्यक्ति ठेकेदार रामचन्द्र सुनुवार हुन् । दायर मुद्दामा अख्तियारले उनीहरूसँग ८० हजार रुपैयाँ बिगो दाबी गरेको छ ।

सव–इन्जिनियर करार राईले घर निर्माण सम्पन्न भएको प्रमाणपत्र उपलब्ध गराएवापत सेवाग्राहीसँग घुस मागिरहेको भन्ने उजुरी परेपछि अख्तियारले अनुसन्धान सुरु गरेको थियो ।

अनुसन्धानका क्रममा टंगालस्थित अख्तियारको कार्यालयबाट गएको टोलीले सव–इन्जिनियर राईलाई सेवाग्राहीबाट ८० हजार रुपैयाँ घुस लिइसकेको अवस्थामा मंसिर १४ गते नियन्त्रणमा लिएको थियो ।

थप अनुसन्धान गर्दा ठेकेदार सुनुवार पनि घुस लेनदेनमा सहभागी भएको पाइएको अख्तियारले जनाएको छ ।