काठमाडौं १ माघ । राष्ट्रिय कृषक समूह महासंघ कोसी प्रदेशले कोसी प्रदेश सरकारलाई ३८ बुँदे ध्यानाकर्षण गराएको छ । खस्कँदो बजार, रोग र सरकारको बेवास्ताका कारण दुग्ध, अर्थोडक्स चिया, अलैँची खेती, तरकारी र अन्नबालीको पछिल्लो अवस्था विकराल बन्दै गएको भन्दै महासंघले प्रदेश सरकारको ध्यानाकर्षण गराएको हो ।

महासंघका प्रदेश अध्यक्ष कुसुम दाहालसहितको प्रतिनिधिमण्डलले आइतबार आन्तरिक मामिला तथा कानुनमन्त्री शमशेर राईलाई ध्यानकर्षणपत्र बुझाएको छ । महासंघले दुग्ध र दुग्धजन्य व्यवसाय करिब एक वर्षदेखि समस्यामा रहेको जनाएको छ ।

यस्तै, खेतबारी मासेर लगाएको हरियो चियापत्तीको मूल्य महिनौँदेखि कृषकले नपाएको महासंघको गुनासो छ । प्रदेशमा अलैँचीको ७५ प्रतिशत बगान मासिएको महासंघले जनाएको छ ।

“यो मुलुककै लागि चुनौतीको विषय हो । तर, यतातर्फ सरकारको ध्यान नपुगेको हाम्रो ठहर छ । तीन तहको सरकारले समस्या समाधानका लागि तत्काल पहल थाल्न ध्यानाकर्षण गराउँछौँ,” विज्ञप्तिमा उल्लेख छ ।

महासंघले भारतबाट आयात गरिने दुग्धपदार्थभन्दा सस्तोमा दुग्ध उत्पादन गर्ने वातावरण बनाउन, लम्पी स्किन रोग नियन्त्रणका निम्ति खोप अभियान तीव्र बनाउन माग गरेको छ ।

यस्तै, चियामा देखिएको समस्या समाधान गर्न, किसानको हरियो चियाको मूल्य भुक्तानी र अलैँची रोग व्यवस्थापन तथा बजार विस्तारमा सहजीकरण गर्न ध्यानाकर्षण गराइएको छ ।