काठमाडौं १८ चैत । अर्थमन्त्री वर्षमान पुनले धरान उपमहानगरपालिकाका समस्या समाधान गर्नका लागि सरकारले प्रयास गर्ने बताएका छन् । धरान उपमहानगरपालिकाका मेयर हर्क साम्पाङले धरान नगरपालिकाका समस्याका विषय राखेका थिए ।

अर्थमन्त्रीले धरानका मेयरलाई भने स् बजेटमा धरानका समस्या समाधानको प्रयास हुनेछ
सिंहदरबारस्थित अर्थ मन्त्रालयमा आइतबार मन्त्री पुनलाई भेट्दै मेयर साम्पाङले खानेपानी आयोजनाका विषयमा अवगत गराएका थिए । जवाफमा मन्त्री पुनले धरानबासीलाई पिउने पानीको व्यवस्था गर्न सरकार गम्भीर रहेको बताएका थिए । खानेपानी अभावका कारण कतिपय सर्वसाधारण धरानबाट बसाई सरेर अन्यत्र गएको समेत आफूले सुनेको उल्लेख गर्दै पुनले भनेका थिए, ‘धरान धेरै राम्रो र सुन्दर सहर हो, त्यहाँ म केही समय बसेको पनि छु । खानेपानी समस्याबारे जानकारी छ । यो बजेटमार्फत केही न केही समाधान खोज्ने प्रयास हुनेछ ।’

सरकारले जनतालाई स्वच्छ खानेपानीको व्यवस्थापन गर्न योजना बनाएको जानकारी दिँदै अर्थमन्त्री पुनले भने, ‘म पनि सम्बन्धित मन्त्रालयसँग कुरा गर्छु । यहाँले पनि उताबाट योजना माग गर्नुहोला । म तपाईंको अभियानमा सँगै हुनेछु ।’

मेयर साम्पाङले धरानबाट करिब १५ किलोमिटर दूरीमा पर्ने चतरास्थित सप्तकोशी नदीबाट लिफ्टिङ गरी पानी ल्याउन सकिने विकल्पबारे मन्त्री पुनलाई जानकारी गराएका थिए । उक्त आयोजनाका लागि करिब ५ अर्ब बजेट आवश्यक पर्ने प्राविधिक अनुमान गरिएको उनले जानकारी गराए ।