काठमाडौं १२ भदौ । घरेलु मैदानमा भइरहेको साफ यू–२० च्याम्पियनसिपको उपाधि जित्ने लक्ष्यमा रहेको नेपालले आज बंगलादेशसँग फाइनल खेल खेल्दैछ ।
फाइनल खेल सातदोबाटोस्थित एन्फा कम्प्लेक्समा दिउँसो २ः४५ बजे सुरु हुनेछ ।
सुरुमा अखिल नेपाल फुटबल संघ ९एन्फा० ले साफ यू–२० को फाइनल दशरथ रंगशालामा गर्ने तयारी गरे पनि दैनिक पानी परिरहेकाले फाइनल खेल पनि एन्फा कम्प्लेक्समै खेलाउन लागिएको हो ।
सिनियरतर्फ नेपालको पुरुष र महिला दुवै टोलीले अहिलेसम्म साफ च्याम्पियनसिप जित्न सकेका छैनन् । यस्तोमा नेपाललाई साफ क्षेत्रमा जुनियर टिमले नै सफलता दिलाउँदै आएका छन् ।
नेपालको सिनियर पुरुष टिम सन् २०२१ मा भएको साफ च्याम्पियनसिप फाइनलमा भारतसँग पराजित भएको थियो । यस्तै महिला टोली २०२२मा घरेलु मैदानमै भएको साफ महिला च्याम्पियनसिपको फाइनलमा बंगलादेशसँग पराजित भएको थियो ।
त्यसैले नेपालका लागि जुनियर टोलीले यसअघि दिलाएको सफलता दोहोर्याउने अवसर छ । सन् २०१५ मा नेपालबाटै साफ यू–१९ च्याम्पियनसिपको नामबाट सुरु भएको प्रतियोगिता कहिले साफ यू–१८ र कहिले साफ यू–२० को नामबाट हुँदै आएको छ ।
च्याम्पियनसिपको छैटौं संस्करणमा आइपुग्दा नेपालले अहिलेसम्म दुई पटक उपाधि जितेको छ ।
सन् २०१५ मा नेपालबाट सुरु भएको साफ यू–१९ मा नेपालले पहिलो संस्करणको फाइनलमा भारतलाई पेनाल्टी सुटआउटमा हराएर उपाधि जितेको थियो ।
यस्तै २०१७ मा भुटानमा भएको साफ यू–१८ मा पनि नेपाल च्याम्पियन बनेको थियो । राउण्ड रोविन लिगका आधारमा भएको उक्त च्याम्पियनसिपमा नेपाल शीर्ष स्थानमा रहेर सिधै च्याम्पियन बनेको थियो ।
रमाइलो संयोग
७ वर्षपछि नेपाल सामु फेरि च्याम्पियन बन्ने अवसर छ । यस पटक फाइनल प्रतिद्वन्द्वी बंगलादेश रहेको छ । बंगलादेशले भने अहिलेसम्म उपाधि जित्न सकेको छैन ।
नेपाल ९ वर्षपछि पहिलो पटक फाइनल खेल्दैछ । पहिलो संस्करणपछि नेपाल पहिलो पटक फाइनल पुगेको हो ।
बंगलादेश भने तेस्रो पटक फाइनल खेल्न लागेको हो । यसअघि सन् २०१९ र २०२२ मा बंगलादेश फाइनल पुगेको थियो । तर दुवै पटक भारतसँग फाइनलमा पराजित हुँदै उपविजेतामा सीमित भएको थियो ।
उमेर समूहको यस प्रतियोगितामा नेपाल अहिलेसम्म बंगलादेशसँग पराजित भएको छैन । त्यही इतिहासलाई कायम राख्ने नेपालको लक्ष्य छ ।
जारी संस्करणमा गरी नेपाल र बंगलादेश अहिलेसम्म चार पटक आमने–सामने भएका छन् । जसमा नेपालले बंगलादेशलाई ३ पटक पराजित गरेको छ भने एक खेल बराबरीमा सकिएको छ । सन् २०१५, २०१७ र २०२४ को लिग चरणमा नेपालले बंगलादेशलाई समान २–१ ले पराजित गरेको थियो भने २०२२ मा १–१ को बराबरी भएको थियो ।
अर्को रमाइलो संयोग के छ भने नेपालले यसअघि बंगलादेशलाई लिगमा पराजित गर्दा दुवै संस्करणमा उपाधि जितेको थियो । यस पटक पनि नेपालले लिगमा बंगलादेशलाई पराजित गरिसकेको छ र फाइनल पनि उही टिमसँग परेको छ ।
घरेलु मैदान र दर्शकको साथ
यस पटक घरेलु दर्शक र मैदानको साथ पाएको नेपाली युवा टोली उपाधि जित्नबाट एक कदम मात्रै टाढा छ । नेपाल सर्वाधिक ३ पटक च्याम्पियन बनेर भारतसँग बराबरी गर्ने लक्ष्यमा छ । उता बंगलादेशको नजर पनि पहिलो उपाधिमा छ ।
नेपाललाई यस पटक घरेलु मैदान र घरेलु समर्थकको साथ छ । जसको फाइदा नेपाललाई हुनेछ । नेपालका मुख्य प्रशिक्षक उर्जन श्रेष्ठले पनि बारम्बार यही भनिरहेका छन् । झन् नेपालले अभ्यास गरेकै एन्फा कम्प्लेक्समा खेल हुँदा त्यसको अझ फाइदा नेपाली टोलीलाई मिलेको छ ।
प्रशिक्षक श्रेष्ठले नेपाल र बंगलादेश समूह चरणमा खेलिसकेकोले एक अर्काका बारेमा थाहा भएको र राम्रो खेल हुने अपेक्षा राखेका छन् । ‘नेपाल र बंगलादेश समूह चरणमा खेलिसकेकाले एक अर्काको बलियो र कमजोर पक्षबारे जानकार छन् । दुवैले विपक्षी टिमको राम्रोसँग विश्लेषण गरेका छन् । योजना बनाएका छन् । फाइनल प्रतिस्पर्धात्मक हुनेछ,’ उनले भने ।
नेपालका कप्तान कुशल देउवाले पनि फाइनलका लागि राम्रो तयारी गरेको बताए । ‘समूह चरणमा बंगलादेशलाई पराजित गरेका थियौँ । फाइनलमा पनि बंगलादेश नै छ । हामीले राम्रोसँग तयारी गरेका छौँ,’ उनी भन्छन् ।
नेपालका मुख्य हतियार
नेपालले समूह चरणमा बंगलादेशलाई २–१ ले पराजित गर्दा ससिर तामाङ र निराजन धामीले गोल गरेका थिए । नेपालको अग्रपंतिमा यी दुई खेलाडी मुख्य हतियारका रुपमा छन् । समिरले राष्ट्रिय टिमबाट खेलिसकेका छन् ।
कप्तान कुशल देउबा, अनिल बम्जन र अविनाश स्याङ्गतान मिडफिल्डमा हुनेछन् ।
यस्तै डिफेन्समा सिमान्त थापा र अश्विन घोरसैनी सहित राम थापा र सविन तिम्सिना छन् । गोलपोष्टको जिम्मेवारी जियारथ शेखले सम्हाल्ने छन् ।
सेमिफाइनलमा जियारथले दुई पेनाल्टी रोकेपछि नेपालले भुटानलाई पेनाल्टी सुटआउटमा ४–१ ले पराजित गरेको थियो ।
बंगलादेशका प्रशिक्षक मरुफुल हकले घरेलु टोली नेपालसँगको फाइनल खेल प्रतिस्पर्धात्मक हुने बताएका छन् । ‘नेपाल घरेलु मैदानमा बलियो प्रतिद्वन्द्वी हो । किनकी धेरै खेलाडीले यहीँ खेलेका छन् । फाइनल प्रतिस्पर्धात्मक हुनेछ र हामी फाइनलका लागि तयार छौँ,’ उनले भने ।
पछिल्लो समय नेपाली फुटबल मैदान भित्रभन्दा मैदान बाहिरको गतिविधिले गर्दा नकारात्मक रुपमा धेरै चर्चा भइरहेको छ । त्यस्तो अवस्थामा यू–२० टिमले उपाधि जित्ने सके यसले नेपाली फुटबलमा केही सकारात्मक सन्देश ल्याउन सक्ने फुटबल विश्लेषकको भनाइ छ ।
प्रतिक्रिया दिनुहोस्