काठमाडौं २९ कात्तिक । इस्टिच्युट अफ स्टेट गर्भरनेन्स अन्तरगत ह्वानजोङ युनिभर्सिटी अफ साइन्स एन्ड टेक्नोलोजीका वाङ पेङले नेपालमा बेल्ट एन्ड रोड इनिसियटिभ बीआरआई अघि नबढ्नुमा तीन कारण औंल्याएका छन् ।

कान्तिपुर मिडिया ग्रुपले आयोजना गरेको कान्तिपुर कन्क्लेभ–२०२४ को ‘भूराजनीतिक खलबल’ सत्रमा बोल्दै वाङले सन् २०१७ मा चीन र नेपालबीच बीआरआईको समझदारी पत्रमा हस्ताक्षर भएको उल्लेख गर्दै हालसम्म सोचे अनुसार नबढ्नुमा तीन विषय प्रस्तुत गरेका हुन् ।

उनले पाकिस्तानको उदाहरण दिँदै नेपालमा राजनीतिक परिवर्तनपछि असर परेको उल्लेख गरे । ‘पाकिस्तानसँग हाम्रो उच्च सम्बन्ध छ । पाकिस्तानले चाइना कार्ड खेल्दैन । त्यहाँ जो प्रधानमन्त्री भए पनि हामीसँग काम गर्छन्,’ उनले भने ।

वाङले दोस्रो कारणको रुपमा नेपालको आन्तरिक र बाह्य भूराजनीतिक खलबल भएको प्रष्ट पारे । नेपाल बलियो इच्छा शक्तिबाट अघि बढ्नुपर्छ,’ उनले भने ।

वाङले तेस्रो महत्वपूर्ण कारणको रुपमा यो क्षेत्रमा भारतीय अधिपत्यको विषय रहेको प्रष्ट पारे । उनले भने,‘चीनले नेपालमा पूर्वाधार, रेलमार्ग र अन्य विकास गर्दा भारतलाई सुरक्षा वा अन्य कुनै समस्या हुन्न् । तर यो क्षेत्रमा जुन हिसाबमा भारतीय अधिपत्य छ, त्यसमा समस्या पर्छ भन्ने रहेको छ ।’