काठमाडौं १९ चैत । काठमाडौँको तीनकुनेमा चैत १५ गते राजावादीको प्रदर्शनमा भएको हिंसात्मक घटनामा संलग्न भएको आरोपमा थप १८ जनालाई हिरासतमा राखेर अनुसन्धान गर्न अदालतले अनुमति दिएको छ।

जिल्ला अदालत काठमाडौँले उनीहरूलाई पहिलोपटक मंगलबारसम्म हिरासतमा राखेर अनुसन्धान गर्न अनुमति दिएको हो।

अब यसअघि हिरासतमा राख्न अनुमति लिइएकाहरूसँगै बुधबार पुनः अदालतमा उपपस्थित गराइने काठमाडौँ प्रहरीका प्रवक्ता एसपी अपिलराज बोहराले बताए।

यसअघि आइतबार ४१ जनालाई हिरासतमा राखेर अनुसन्धान गर्न अदालतबाट प्रहरीले अनुमति पाएको छ।

मंगलबार म्याद थप भएकामध्ये ८ जनालाई राज्यविरुद्धको कसुर र संगठित अपराधमा अनुसन्धान गर्न अनुमति लिइएको छ। अरू १० जनालाई आपराधिक उपद्रवमा अनुसन्धान अगाडि बढाइने एसपी बोहराले बताए।

नवराज सुवेदीको संयोजकत्व र दुर्गा प्रसाईंको अगुवाइमा भएको हिंसात्मक प्रदर्शनमा दुई जनाको ज्यान गएको थियो।

उक्त घटनामा संलग्न रहेको आरोपमा पक्राउ परेका राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्र र महामन्त्री एवम् प्रतिनिधि सभाका सांसद धवलशमशेर राणासमेत ४१ जना यसअघि नै हिरासतमा छन्।

प्रहरीले पक्राउ गरेका केहीलाई भने अभद्र व्यवहारमा म्याद लिएर अनुसन्धान गरिरहेको छ। उनीहरू भाटभटेनीमा ससाना समान लुटपाटमा संलग्नहरू छन्।