काठमाडौं २५ चैत । मकवानपुरमा आज बिहान बसको ठक्करबाट एक जनाको मृत्यु भएको छ।

मनहरी गाउँपालिका वडा नम्बर–९ खरङ्गास्थित पूर्व–पश्चिम राजमार्गामा बसको ठक्करबाट उदयपुर त्रियुगा नगरपालिका वडा नम्बर–२, संगमटोल घर भएका ५८ वर्षीय जितबहादुर प्रधानको मृत्यु भएको हो।

प्रधान काठमाडौँबाट जनकपुरतर्फ जाँदै गरेको बा प्र ०१–००६ ख ६७१६ नम्बरको गाडीका यात्रु हुन्।

सोमबार बिहान यात्रुलाई शौचालय जानको लागि प्रधान सवार बस रोकेको बेला बाटो क्रस गर्ने अर्को बसले ठक्कर दिएको हो।

बाटो पार गर्ने क्रममा सोही दिशाबाट आउँदै गरेको ना ८ ख १८०९ नम्बरको बसले प्रधानलाई ठक्कर दिँदा उनको मृत्यु भएको जिल्ला प्रहरी कार्यालय मकवानपुरले जनाएको छ।

बसले ठक्कर दिँदा गम्भीर घाइते भएका प्रधानलाई उपचारका लागि हेटौँडा अस्पताल पुर्याउँदा डाक्टरले मृत्यु घोषणा गरेका जिल्ला प्रहरी कार्यालय मकवानपुरका प्रहरी नायब उपरीक्षक श्यामु अर्यालले जानकारी दिए।

दुर्घटनापछि ठक्कर दिने बसका चालक धादिङको सिद्धलेक गाउँपालिका वडा नम्बर–३ बस्ने २६ वर्षीय मोहन थापा मगरलाई प्रहरीले नियन्त्रणमा लिएको छ।