काठमाडौं ४ बैशाख । नेपाल प्रहरीका ६ जना नायब महानिरीक्षक डीआईजी अतिरिक्त महानिरीक्षक ९एआईजी० पदमा बढुवा सिफारिस भएका छन्।
बिहीबार बसेको बढुवा समितिको बैठकले ६ जनालाई एआईजीमा बढुवा गर्न सिफारिस गरेको हो।

बढुवा सूचीको पहिलो नम्बरमा चन्द्रकुवेर खापुङ परेका छन्। त्यसपछि क्रमशः लालमणि आचार्य, कृष्णहरि पोखरेल, दानबहादुर कार्की, राजन अधिकारी र डा मनोजकुमार केसी छन्।

उनीहरूलाई डीआईजीमा बढुवा भएको वरियता अनुसार नै एआईजीमा बढुवा सिफारिस गरिएको छ। एआईजी सिफारिस भएका खापुङ, आचार्य र शर्मा २०५२ साल कात्तित्तकमा भर्ना भएका हुन्।

बाँकी ३ जना २०५४ सालमा प्रहरी निरीक्षकमा भर्ना भएका हुन्। २०५३ सालमै राष्ट्रिय अनुसन्धान विभागमा भर्ना भएको टोली नै बढुवामा छुटेको छ।

खापुङ र आचार्य २०७९ चैत ३० गते डीआईजीमा बढुवा भएका थिए। शर्मा भने त्यतिबेलाको बढुवामा छुटेर २०८१ जेठमा मात्रै डीआईजी भए।

खापुङ अहिले सीआईबीमा, आचार्य मधेस प्रदेश प्रमुख र शर्मा बागमती प्रदेश प्रहरी प्रमुख छन्। यी तीनै जना प्रहरी महानिरीक्षक दीपक थापासँगै प्रहरी निरीक्षकमा प्रतिस्पर्धा गरेर वैकल्पिक सूचीमा रहेका र २०५२ कात्तिकमा भर्ना भएका थिए।

उनीहरूमध्ये एकजना प्रहरी महानिरीक्षक बनेर २ महिना संगठनको नेतृत्व गर्ने सम्भावना पनि छ। शर्मासँगै डीआईजीमा बढुवा भएका दानबहादुर कार्की, मनोज केसी र राजन अधिकारी पनि एआईजी बनेका छन्। तर केसीलाई भन्दा अगाडी अधिकारीलाई ल्याइएको छ।

कार्की लुम्बिनी प्रदेश प्रहरी प्रमुख, अधिकारी कोसी प्रदेश प्रहरी प्रमुख र केसी राष्ट्रिय प्रहरी प्रशिक्षण प्रतिष्ठानमा छन्। २०५३ सालमा राष्ट्रिय अनुसन्धान विभागमा भर्ना भएको सिद्धिविक्रम शाहसहितको टोली भने यसपटक पनि बढुवामा छुटेको छ। यसअघि रवि लामिछानेले शाहको टोलीलाई छुटाएर २०५४ को टोलीलाई अगाडी बढाएका थिए। अहिलेको सरकारले पनि त्यही टोलीलाई अगाडी बढाएको हो।

शाहसहित उनको ब्याचका ५ जना २०८१ मंसिरमा डीआईजीमा बढुवा भए। उनीसँगै बढुवा भएका सुशीलसिंह राठौर, उमाप्रसाद चतुर्वेदी, हिमालयकुमार श्रेष्ठ र डम्बरबहादुर विक यसपटक पनि पछि परे। डीआईजीमा अन्याय भएको भन्दै एआईजीमा अगाडि आउनु पर्ने उनीहरूको जोड थियो।

जनपदतर्फ ८ जना एआईजीको दरबन्दी रहेको प्रहरीमा अहिले २ जना मात्रै कार्यरत छन्।

प्रहरी राष्ट्रिय प्रशिक्षण प्रतिष्ठानमा सुदीप गिरी र काठमाडौँ उपत्यका प्रहरी कार्यालय कार्यालय रानीपोखरीका प्रमुख टेकबहादुर तामाङ मात्रै कार्यरत छन्। प्रहरी प्रधान कार्यालयका ५ वटा विभाग र केन्द्रीय अनुसन्धान ब्युरो ९सीआईबी० समेत प्रमुखविहीन भएको छ।

प्रहरी प्रधान कार्यालयका अपराध अनुसन्धान विभाग, कार्य विभाग, मानवस्रोत विकास विभाग, प्रशासन विभाग र प्रदेश समन्वय विभागमै एआईजी छैनन्। यी विभागको प्रमुख एआईजी हुन्छन्।

यस्तै सीआईबीका प्रमुख रहेका दीपक थापा आईजीपी भएपछि त्यो पद पनि रिक्त छ।