काठमाडौं १० असार । अमेरिकी राष्ट्रपति डोनाल्ड ट्रम्पले इजरायललाई इरानमाथि आक्रमण कडा चेतावनी दिएका छन् ।

राष्ट्रपति ट्रम्पले इजरायल र इरान दुवैले युद्धविराम उल्लंघन गरेको भन्दै ‘इजरायलप्रति निकै असन्तुष्ट’ भएको बताएका छन्। उनले इजरायललाई बम खसाल्न बन्द गर्न र ‘तुरुन्तै आफ्ना पाइलटहरूलाई घर फर्काउन’ आह्वान गरेका छन् ।
ट्रम्पले आफ्नो सोसल साइटमा लेखेका छन्ः’इजरायलले इरानमाथि आक्रमण गर्ने छैन। सबै विमानहरू फर्किनेछन् र घर फर्कने क्रममा इरानप्रति मैत्रीपूर्ण ‘प्लेन वेभ’ गर्नेछन्। कसैलाई चोटपटक लाग्ने छैन, युद्धविराम प्रभावमा छ ! यो विषयमा ध्यान दिनुभएकोमा धन्यवाद!’

इजरायली रक्षामन्त्री इजरायल काट्जले तेहरानमाथि ‘तीव्र आक्रमण’ को आदेश दिएको कारणमा इरानले अमेरिका र कतारद्वारा मध्यस्थता गरिएको युद्धविराम उल्लंघन गरेको जबाफ भन्दै आफ्नो युद्धोन्मादी रबैयाको बचाउ गरेका छन् ।
इरानले भने इजरायलको यस्तो दाबी अस्वीकार गरेको छ । तेहरानले पनि इजरायलको कुनै पनि युद्धविराम उल्लंघनको जवाफमा निर्णायक रूपमा प्रतिक्रिया दिन आफ्ना सेनाहरू तयार रहेको चेतावनी फर्काएको छ ।
इरानले सोमबार आफ्ना आणविक स्थलहरूमा भएको अमेरिकी आक्रमणको प्रतिक्रियाका रुपमा कतारमा रहेको अमेरिकी सैन्य अखडामा मिसाइलहरू प्रहार गरेको थियो ।
इरानका अनुसार, इजरायलले जुन १३ मा आक्रमण शुरू गरेदेखि ४०० भन्दा बढी व्यक्ति (१३ बालबालिका समेत), मारिएका छन् भने कम्तीमा ३,०५६ जना घाइते भएका छन्। इजरायलमा इरानी आक्रमणबाट कम्तीमा २८ जनाको मृत्यु भएको पुष्टि गरेको छ ।
विश्वकै शक्तिशाली राष्ट्र अमेरिकाका राष्ट्रपतिको युद्धविराम प्रस्तावलाई उसकै सहयोगी र व्यक्तिगत रुपमा राष्ट्रपति ट्रम्पका अभिन्न मित्र जस्ता देखिएका बेन्जामिन नेतान्याहुले युद्धविराम उल्लंघन गर्दा अमेरिकी बर्चस्व दाउमा परेको छ ।