काठमाडौ ७ साउन । आम जनता पार्टीका अध्यक्ष प्रभु साहले देवता भेट्न बरु सहज रहेको तर परराष्ट्रमन्त्री भेट्न गाह्रो भएको टिप्पणी गरेका छन्। प्रतिनिधिसभाको बुधबारको बैठकमा साहले रौतहटका जयप्रकाश साह करिब एक वर्षदेखि युक्रेनमा फसेको तर उद्धारमा कसैले चासो नदेखाएको भन्दै परराष्ट्रमन्त्रीको कार्यसम्पादनमा प्रश्न गरेका हुन्।

पीडित परिवार उद्धारका लागि भन्दै सरकारी कार्यालय धाइरहँदा पनि सम्बन्धित निकायले चासो नदेखाएको उनको आरोप छ। ‘रौतहटको जयप्रकाश साह झन्डै एक वर्षदेखि युक्रेनमा फसेको छ। जयप्रकाश जस्तै सयौँ मानिस युक्रेनमा फसेका छन्, उनले भने, त्यसलाई उद्धार गर्न कसैको वास्ता छैन। पीडितहरू सरकारी निकाय घुमिरहेका छन्। युक्रेनबाट मान्छे फर्काइदेउ भनेर। मैले नजिकबाट हेर्दा देउता भेट्न सहज छ तर परराष्ट्रमन्त्री भेट्न गाह्रो छ।

उनले झ्याप झ्याप बिजुली बत्ती गइरहेको विषयमा पनि प्रश्न गरे। सरकारको लापरबाहीले बिजुली बत्ति झ्याप झ्याप गइरहेको छ। कि त भन्नुपर्छ सरकारको कुनै भूमिका होइन। म्यानेजमेन्टकै भूमिका हो भने किन बत्ति गइरहेको छरु बत्ती काट्ने भए पहिलादेखि नै सेड्युल बनाएर बत्ती काट्नुस्’ उनले भने।