काठमाडौं, २५ चैत । तस्करीको ३३ किलो सुन गायब सँगै हत्या गरिएका उर्लाबारीका सनम शाक्य ‘हत्या प्रकरण’ मा शंकास्दप भूमिका देखिएका एसएसपी दिवेश लोहनीसहित तीन सुरक्षा अधिकारी प्रहरी प्रधान कार्यालयमा तानिएका छन् ।

शुक्रबार प्रहरी प्रधान कार्यालयले पत्राचार गरेर एसएसपी लोहनी, डिएसपी प्रजित केसी र प्रहरी नायब निरीक्षक बालकृष्ण सञ्जेललाई प्रहरी हेडक्वार्टरको मानवश्रोत विकास विभागमा हाजिर हुन निर्देशन दिएको छ । गृह मन्त्रालयको निर्णयअनुसार प्रहरी अधिकृतहरुलाई हेडक्वार्टर तानिएको प्रहरी प्रवक्ता डिआईजी मनोज नेउपानेले हस्ताक्षर गरेको पत्रमा उल्लेख गरिएको छ ।

फागुन पहिलो साता चुडामणि उप्रेती ‘गोरे’ले चिनको केरुङ नाका हुँदै ल्याएको सुन भरियाले लुकाएको भन्दै यातना दिने क्रममा मोरङको उर्लाबारी–७ स्थायी घर भएका शाक्यको गत फागुन १८ गते हत्या भएको थियो ।

फागुन १९ गते विराटनगरको पोखरीयाबाट महानगरीय अपराध महाशाखाका डिएसपी प्रजित केसी र प्रहरी नायब निरीक्षक बालकृष्ण सञ्जेल समेतको टोलीले शाक्यको शव बरामद गरेको थियो । ‘सनम हत्या प्रकरण’मा प्रहरीको भूमिका शंकास्पद देखिएको भन्दै गठित छानबिन समितिको सिफारिसमा एसएसपी लोहनीसहित तीन अधिकृतलाई महाशाखाको जिम्मेवारीबाट हटाईएको छानबिन समितिमा रहेका एक उच्च अधिकृतले जानकारी दिएका छन् ।

तस्करीको आधा अर्थात साँढे १६ किलो सुनको लोभमा प्रहरी अधिकृतले सनमको हत्यापछि ‘शव व्यवस्थापन’को जिम्मा लिएको सुचना पाएपछि गृहमन्त्री रामबहादुर थापाले प्रहरी प्रधान कार्यालयलाई घटना छानबिन गर्न निर्देशन दिएका थिए ।