धादिङ, २६ चैत । चेक जाँचका क्रममा भारतीय गाडीमा अवैध सामानहरु भेटिन थालेपछि नेपाल प्रहरीले भारतीय गाडीमा निगरानी बढाएको छ ।

राजमार्गको बाटोबाट अवैध रुपमा सामान ओसार पसार हुने भएकोले चेकजाँच र रातिको गस्तिलाई बढाएको प्रहरीले जानकारी दिएको छ । दुई दिन अघि प्रहरीले राजमार्गमा गरेको चेकजाँचका क्रममा भारतीय गाडीबाट ठूलो मात्रामा अवैध सामाग्री बरामद गरेपछि प्रहरीले भारतीय गाडीमाथि निगरानी बढाएको बताएको हो ।

गएको शुक्रबार काठमाडौबाट भारततर्फ जाँदै गरेका दुई वटा गाडीबाट डेढ करोड बराबरका अवैध विद्युतीय सामग्री, विदेशी चुरोट र १ सय ६७ किलो चरेस धादिङ प्रहरीले बरामद गरेको प्रहरी नायव उपरीक्षक रामबहादुर केसीले बताउनुभयो ।

विशेष सूचनाका आधारमा प्रहरीले खानतलासी गर्दा प्रहरीले मझिमटारबाट एचआर ५५ एन १९१० नम्बररको भारतीय कन्टेनरबाट विद्युतीय सामान र चुरोट बरामद गरेको हो । कन्टेनरबाट एक करोड ५० लाख बराबरको मार्लबोरो १७ हजार प्याकेट, पेन्टम ४ ब्राण्डको ३ थान ड्रोन क्यामरा र ब्याट्री, १६ सय थान घडी, चाइनिज मोबाइलहरु बरामद गरी गाडीलाई समेत प्रहरीले नियन्त्रण लिएर थप अनुसन्धान सुरु गरेको छ ।

गजुरी–१ गलौंदीस्थित पेट्रोल पम्प नजिकै काठमाडौंबाट वीरगञ्ज जाँदै गरेको एचआर ५५ एक्स २५४९ नम्बरको कन्टेनरबाट ७ वटा प्लास्टिकका बोरामा लुकाएको अवस्थामा एक सय ६६ किलो ६ सय ग्राम चरेस समेत प्रहरीले बरामद गरेको छ ।