काठमाडौं २० जेष्ठ । एसीसी महिला प्रिमियर कप क्रिकेट प्रतियोगितामा नेपालले आज आफ्नो पहिलो खेलमा कतारसँग प्रतिस्पर्धा गर्दैछ । मलेसियामा जारी प्रतियोगिताअन्तर्गत समूह ‘डी’ मा रहेको नेपाल र कतारबीचको खेल नेपाली समयअनुसार बिहान ७ बजेर १५ मिनेटमा सुरु हुनेछ ।

महिला टी–२० एसिया कपको छनोट प्रतियोगितासमेत रहेको एसीसी महिला प्रिमियर कपमा कुल १८ टोली सहभागी छन् । सहभागी टोलीलाई चार समूहमा विभाजन गरिएको छ । नेपाल रहेको समूहमा कतार, भुटान र हङकङ रहेका छन् ।

नेपालले आफ्नो दोस्रो खेल भोलि भुटानसँग खेल्नेछ भने समूह चरणको अन्तिम खेल जेठ २३ गते हङकङसँग खेल्ने तालिका रहेको छ ।

प्रतियोगिताको प्रत्येक समूहबाट शीर्ष दुई टोली क्वार्टरफाइनलमा प्रवेश गर्नेछन् । चारवटै क्वार्टरफाइनल खेल जेठ २७ गते आयोजना हुनेछन् । त्यसपछि जेठ २९ गते सेमिफाइनल खेलहरू तथा जेठ ३० गते तेस्रो स्थानका लागि प्लेअफ र फाइनल खेल हुनेछ ।

यस प्रतियोगिताबाट उत्कृष्ट चार टोली आगामी महिला टी–२० एसिया कपका लागि छनोट हुनेछन् । नेपालले एसिया कपमा स्थान सुरक्षित गर्ने लक्ष्यसहित प्रतियोगिताको सुरुआत कतारविरुद्धको खेलबाट गर्दैछ ।