काठमाडौं । जेन–जी आन्दोलनका शहीद परिवार र घाइतेहरूले आफ्ना माग तत्काल सम्बोधन गर्न सरकारलाई अल्टिमेटम दिएका छन् । माग पूरा नभए पुनः सडक संघर्षमा उत्रिने उनीहरूले चेतावनी दिएका छन् ।

जेन–जी शहीद परिवार कल्याणकारी समाज र घाइते जेन–जी नेपाल संयुक्त संघर्ष समितिले आइतबार काठमाडौंमा पत्रकार सम्मेलन गर्दै सरकारलाई तत्काल माग सम्बोधन गर्न आग्रह गरेका हुन् ।

पत्रकार सम्मेलनमा जेन–जी शहीद श्रीयम चौलागाईंका पिता तथा जेन–जी शहीद परिवार कल्याणकारी समाजका कोषाध्यक्ष गणेशप्रसाद चौलागाईंले सरकारले शहीद परिवार र घाइतेका माग सम्बोधनमा गम्भीरता नदेखाएको आरोप लगाए ।

उनका अनुसार गृहमन्त्री सुधन गुरुङले सरकार गठन भएको एक महिनाभित्र जेन–जी आन्दोलनका शहीद परिवार र घाइतेका सबै माग पूरा गर्ने आश्वासन दिएपछि आन्दोलनका कार्यक्रम स्थगित गरिएको थियो । तर, अहिलेसम्म माग सम्बोधनमा ठोस प्रगति नभएको उनले बताए ।

‘गृहमन्त्री सुधन गुरुङले हामीलाई एक महिनाको समय दिनुहोस्, सबै माग पूरा गर्छु भनेको हुनाले हामीले सबै आन्दोलनका कार्यक्रम स्थगित गरेका हौँ । तर अब त्यो अवस्था छैन,’ उनले भने ।

चौलागाईंले घटना भएको १२ महिना बितिसक्दा पनि सरकारले विश्वास गर्ने आधार तयार गर्न नसकेको आरोप लगाए । विगतमा शहीद परिवार र घाइतेसँग भएका सहमति कार्यान्वयन नभएको उनको भनाइ छ ।

उनले मन्त्रालयका सहसचिव, शहीद परिवार र घाइतेका प्रतिनिधि सम्मिलित समितिले टुंग्याएका विषय कार्यान्वयन हुने सुनिश्चितता माग गर्दा पनि सरकारले त्यसको ग्यारेन्टी दिन नचाहेको बताए ।

‘१२ महिना हुँदा समेत सरकारले विश्वास लाग्ने काम पनि गरेन, कुरा पनि गरेन । हामीले मन्त्रालयका सहसचिव र घाइते तथा शहीद परिवारका दुई–दुई जना सम्मिलित बैठकमा समेत यो समितिले टुंग्याएका सबै विषय सरकारले हुबहु पास हुने ग्यारेन्टी दिनुस् भनेर भनेका थियौँ । तर उहाँहरूले मान्नुभएन । हामीहरूले दुःखबाहेक केही पनि पाएनौँ,’ उनले भने ।

उनले सरकारले पटक–पटक समिति गठन गर्ने तर ती समितिले प्रभावकारी रूपमा काम गर्न नसकेको आरोपसमेत लगाए । यसले सरकारप्रतिको आफूहरूको विश्वास कमजोर बन्दै गएको उनको भनाइ छ ।

चौलागाईंले शहीद परिवार र घाइतेका माग सम्बोधनमा तत्काल ठोस निर्णय नभए पुनः आन्दोलनमा जाने चेतावनी दिए ।

Originally published on abcnews.com.np.