धनगढी । सुदूरपश्चिम प्रदेशका मुख्यमन्त्री खगराज भट्टले विधिपूर्वक पूजाआजा गरी बडिमालिका भगवती माताको परम्परागत पेटारो बडिमालिकातर्फ प्रस्थान गराएका छन्।

सुदूरपश्चिमको धार्मिक, ऐतिहासिक तथा सांस्कृतिक महत्व बोकेको बडिमालिका पूजाका लागि मुख्यमन्त्री भट्टले प्रदेश सरकारका मन्त्री, सचिव तथा सम्बन्धित अधिकारीहरूको उपस्थितिमा विधिपूर्वक पूजा–अर्चना गरेका हुन्। पूजापछि परम्परागत विधिअनुसार पेटारोलाई बडिमालिकातर्फ पठाइएको हो।

बडिमालिकामा पूजा गर्न डोटीबाट पेटारो पठाउने परम्परा लामो समयदेखि चलिआएको धार्मिक तथा सांस्कृतिक परम्परा हो। पेटारोमा बडिमालिका भगवतीलाई चढाइने विशेष पूजा सामग्री राखिन्छ। सरकारी पूजा टोलीले विभिन्न धार्मिकस्थलमा पूजाआजा गर्दै पैदल यात्रामार्फत बडिमालिका पुगेर निर्धारित विधिअनुसार मुख्य पूजा गर्ने परम्परा रहेको छ।

परम्पराअनुसार बडिमालिका पुगेपछि डोटी, बाजुरा र जुम्लाबाट पुगेका सरकारी पूजा टोलीबीच समन्वय गरी मुख्य पूजामा सहभागी हुने गरिन्छ।

यस वर्ष बडिमालिकाको मुख्य पूजा भदौ ११ गते हुने भए पनि दर्शनार्थीको बढ्दो चापलाई मध्यनजर गर्दै भदौ १ गतेदेखि नै मन्दिरमा पूजा तथा मेला सुरु गरिएको छ।

पेटारो पठाउने परम्पराले बडिमालिका भगवतीप्रतिको धार्मिक आस्थाका साथै सुदूरपश्चिमको इतिहास, संस्कृति र मौलिक परम्परालाई जीवन्त राख्दै आएको छ। राज्यस्तरबाट निरन्तरता दिइँदै आएको यस धार्मिक तथा सांस्कृतिक परम्पराको संरक्षण र प्रवर्द्धनमा प्रदेश सरकारले पनि जोड दिँदै आएको छ।

Originally published on abcnews.com.np.