काठमाडौं २६ जेष्ठ । फिफा विश्वकप २०२६ सम्बन्धित कार्यक्रममा सहभागी हुन अमेरिका जाँदै गरेका अखिल नेपाल फुटबल संघ (एन्फा) का अध्यक्ष पंकजविक्रम नेम्वाङ र महासचिव किरण राईलाई त्रिभुवन अन्तर्राष्ट्रिय विमानस्थलबाट फर्काइएको छ ।

अध्यागमन अधिकारीका अनुसार उनीहरू कालोसूची (ब्ल्याकलिस्ट) मा परेकाले विदेश प्रस्थानमा रोक लगाइएको हो । उनीहरू आज बिहान मेक्सिको हुँदै अमेरिका जाने तयारीमा थिए ।

त्रिभुवन अन्तर्राष्ट्रिय विमानस्थल अध्यागमन कार्यालयका एक अधिकारीले बताए अनुसार, “उहाँहरू ब्ल्याकलिस्टमा रहेकाले हामीले आज बिहान विमानस्थलबाट फर्काइदिएका हौँ।”

यसअघि आर्थिक विषयको छानबिनका लागि राष्ट्रिय खेलकुद परिषद (राखेप) को सिफारिसमा अध्यागमन विभागले गत वैशाखमै एन्फाका सबै पदाधिकारीलाई विदेश यात्रा रोक लगाएको थियो ।

तर एन्फा नेतृत्वले विश्वकपसँग सम्बन्धित भ्रमणका लागि विदेश जान अनुमति दिन माग गर्दै निर्णय फिर्ता गराउन प्रयास गरेको भए पनि राखेपले अनुमति नदिएको बताइएको छ ।