काठमाडौं, २० असार । भारतीय प्रधानमन्त्री नरेन्द्र मोदीले अर्को हप्ता इन्डोनेसिया, अस्ट्रेलिया र न्युजिल्यान्डको भ्रमण गर्नुहुने भएको छ । नयाँ दिल्लीले क्षेत्रीय रणनीतिक सम्बन्धलाई मजबुत बनाउन खोजिरहेको समयमा मोदीले तीन देशको भ्रमण गर्न लागेको समाचार संस्था एएफपीले जनाएको छ ।

आउँदो बुधवार अर्थात् जुलाई ८ देखि ११ तारिखसम्म हुने यो भ्रमण मोदीको गएको वर्ष मार्चमा मौरिसस र गएको महिना सिसेल्सको भ्रमणपछि हुन लागेको हो । भारतको विदेश मन्त्रालयले यसलाई ‘एक्ट इस्ट’ नीतिअन्तर्गत पूर्वी समुद्री क्षेत्रमा कूटनीतिक ध्यान केन्द्रित गरेको रूपमा विश्लेषण गरेको छ ।

प्रधानमन्त्री मोदी जुलाई ८ र ९ मा इन्डोनेसियामा रहनुहुनेछ । भारतीय विदेश मन्त्रालयका वरिष्ठ अधिकारी रुद्रेन्द्र टण्डनका अनुसार प्रधानमन्त्री मोदीले इन्डोनेसिया भ्रमणका क्रममा समुद्री सुरक्षा, रक्षा, व्यापार र सांस्कृतिक सम्बन्धलगायत विभिन्न क्षेत्रमा सहकार्यको समीक्षा गर्नुहुनेछ ।

जुलाई १० मा उहाँ मेलबर्न जानुहुनेछ । त्यहाँ तेस्रो भारत–अस्ट्रेलिया वार्षिक शिखर सम्मेलन हुनेछ । प्रधानमन्त्री मोदीले जुलाई ११ मा न्युजिल्यान्डबाट भ्रमण सम्पन्न गर्ने कार्यक्रम तय भएको छ ।

यो वर्ष अप्रिल २७ मा हस्ताक्षर भएको भारत–न्युजिल्यान्ड स्वतन्त्र व्यापार सम्झौताले न्युजिल्यान्डतर्फ भारतीय निर्यातमा १०० प्रतिशत भन्सार शुल्क हटाएको छ भने आउँदो १५ वर्षमा न्युजिल्यान्डबाट २० अर्ब डलरको लगानी प्रतिबद्धता सुनिश्चित गरेको छ ।