ईश्वरपुर नगरपालिकाबाटै भूमि प्रशासन सेवा सञ्चालनको तयारी, मन्त्रालयले दियो समन्वय गर्न निर्देशन

काठमाडौ, असार ३० गते । भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालयले सर्लाहीको ईश्वरपुर नगरपालिका सहित तीन स्थानीय तहमा स्थानीय स्तरबाटै भूमि प्रशासन ९मालपोत तथा नापी० सेवा सञ्चालनको प्रक्रिया अघि बढाउन सम्बन्धित निकायलाई निर्देशन दिएको छ। मन्त्रालयको २०८३ असार २३ गतेको निर्णयअनुसार भूमि व्यवस्थापन तथा अभिलेख विभाग र नापी विभागलाई आवश्यक समन्वय गरी सेवा सञ्चालनका लागि तयारी गर्न पत्राचार गरिएको हो। मन्त्रालयले जारी गरेको पत्रअनुसार स्थानीय तहमा आवश्यक जनशक्ति, पूर्वाधार तथा प्राविधिक तयारी सुनिश्चित गर्दै सम्बन्धित कर्मचारीलाई खटाउने, तालिम सञ्चालन गर्ने र सेवा प्रवाह सहज बनाउने व्यवस्था मिलाउन आग्रह गरिएको छ। यस चरणमा कैलालीको धनगढी उपमहानगरपालिका, सर्लाहीको ईश्वरपुर नगरपालिका र दोलखाको बैतेश्वर नगरपालिकालाई समेटिएको छ। ईश्वरपुर नगरपालिकाका नगरप्रमुख मनोज कुमार आचार्यले मन्त्रालयको निर्णयलाई स्थानीय नागरिकका लागि निकै महत्वपूर्ण उपलब्धि भएको बताएका छन्। भूमि प्रशासनसम्बन्धी सेवा नगरपालिकाबाटै सञ्चालन हुन थालेपछि नागरिकले मालपोत र नापीका सामान्य कामका लागि टाढासम्म धाउनुपर्ने बाध्यता अन्त्य हुनेछ। नगरपालिकाले आवश्यक पूर्वाधार, जनशक्ति व्यवस्थापन र मन्त्रालयसँगको समन्वयलाई तीव्र बनाउँदै सेवा छिट्टै सञ्चालन गर्ने तयारी गर्नेछ। नगरप्रमुख आचार्यका अनुसार सेवा सञ्चालन भएपछि जग्गा नामसारी, अभिलेख व्यवस्थापन तथा अन्य भूमि प्रशासनसम्बन्धी सेवामा नागरिकको समय, खर्च र झन्झट उल्लेखनीय रूपमा घट्ने अपेक्षा गरिएको छ। मन्त्रालयले देशभरका इच्छुक स्थानीय तहमा चरणबद्ध रूपमा भूमि प्रशासन सेवा विस्तार गर्ने नीति अनुरूप ईश्वरपुर नगरपालिकालाई पनि सेवा सञ्चालनको तयारी अगाडि बढाएको जनाएको छ ।