काठमाडौं १० साउन । अनशनरत डा. गोविन्द केसीसँग आज औपचारिक वार्ताको तयारी गरिएको छ। यसअघि अनौपचारिक छलफल भइसकेको अवस्थामा सरकारले वार्ताका लागि उच्चस्तरीय टोली धनगढी पठाएको हो।

शिक्षा, विज्ञान तथा खेलकुद मन्त्रालयका सचिव चूडामणि पौडेल हिजो नै धनगढी पुग्नुभएको छ। त्यस्तै शिक्षा तथा खेलकुदमन्त्री सस्मित पोखरेलले हिजो साँझ डा. केसीका सहयोगी अमृत जैसीसँग टेलिफोनमार्फत संवाद गर्नुभएको थियो।

प्रधानमन्त्रीका स्वास्थ्य सल्लाहकार डा. जे.पी. अग्रवाल र स्वास्थ्य सचिव विकास देवकोटा पनि आज औपचारिक वार्तामा सहभागी हुन धनगढी पुग्ने कार्यक्रम रहेको छ।

धनगढीस्थित कृष्ण मन्दिर धर्मशालामा अनशन सुरु गर्नुभएका डा. केसीको स्वास्थ्य अवस्था गम्भीर बनेपछि उहाँलाई सेती प्रादेशिक अस्पतालमा भर्ना गरिएको छ।

चिकित्सा शिक्षा आयोगमा उपाध्यक्ष तथा गेटा मेडिकल कलेज (शहीद दशरथ चन्द स्वास्थ्य विज्ञान विश्वविद्यालय) का उपकुलपति र रजिस्टार नियुक्ति गैरकानुनी भएको आरोप लगाउँदै डा. केसीले बिहीबारदेखि आमरण अनशन सुरु गर्नुभएको हो।

यता, शहीद दशरथ चन्द स्वास्थ्य विज्ञान विश्वविद्यालय स्थापनार्थ सङ्घर्ष समितिले पनि विश्वविद्यालयका पदाधिकारी नियुक्तिसम्बन्धी डा. केसीले उठाएका विषयमा सम्बन्धित निकायले स्पष्ट धारणा सार्वजनिक गर्नुपर्ने माग गरेको छ।