काठमाडौं । नेपालका निम्ति भियतनामका अवैतनिक महावाणिज्यदूत राजेशकाजी श्रेष्ठलाई त्यहाँको परराष्ट्र मन्त्रालयले प्रमाणपत्रसहित प्रतिष्ठित ‘आउटस्ट्यान्डिङ अवार्ड’ प्रदान गर्दै सम्मान गरेको छ ।

नेपाल–भियतनामबीचको व्यापारिक, पर्यटन तथा सांस्कृतिक सम्बन्धलाई सुदृढ र थप उचाइमा पुर्याउन सेतुका रूपमा महत्त्वपूर्ण भूमिका निर्वाह गरेको भन्दै उनलाई यो अवार्ड प्रदान गरिएको हो ।

यस्तै, नेपालस्थित भियतनामी नागरिक तथा व्यवसायीलाई आवश्यक सहजीकरण प्रदान गर्दै द्विपक्षीय सहयोग अभिवृद्धिमा पुर्याएको उल्लेखनीय योगदानको उच्च मूल्यांकन गर्दै उनलाई ‘भियतनामको वैदेशिक सेवामा योगदान’अन्तर्गत उक्त प्रतिष्ठित सम्मान प्रदान गरिएको जनाइएको छ ।

कन्सुलरमध्येमा अग्रस्थानमा राखी प्रदान गरिएको उक्त प्रमाणपत्रमा भियतनामका परराष्ट्रमन्त्री हो बिन्ह ट्रुङले हस्ताक्षर गरेका छन् ।

उनलाई प्रदान गरिएको सम्मानपत्रमा नेपाल–भियतनामबीचको कूटनीतिक सम्बन्ध सुदृढ गर्न, आपसी सहयोग विस्तार तथा भियतनामको वैदेशिक सेवाको प्रवर्द्धनमा श्रेष्ठले पुर्याएको योगदान उल्लेखनीय रहेको उल्लेख छ ।

भियतनामको परराष्ट्र मन्त्रालयले श्रेष्ठले देशको कूटनीतिक क्षेत्रको विकास, अन्तर्राष्ट्रिय सम्बन्ध विस्तार तथा वैदेशिक सेवाको सुदृढीकरणमा महत्त्वपूर्ण भूमिका निर्वाह गरेको भन्दै उनको योगदानको उच्च प्रशंसा गरेको छ ।

अवैतनिक महावाणिज्यदूत श्रेष्ठले यो सम्मानका निम्ति भियतनाम सरकार, परराष्ट्र मन्त्रालय, नयाँ दिल्लीस्थित भियतनाम दूतावास तथा सम्पूर्ण सम्बद्ध निकायप्रति हार्दिक आभार व्यक्त गरेका छन् । उनले नेपाल–भियतनामबीचको सहकार्यलाई अझ प्रभावकारी, सुदृढ र परिणाममुखी बनाउन निरन्तर सक्रिय रहने प्रतिबद्धता पनि व्यक्त गरे ।

उक्त अवसरमा अवैतनिक महावाणिज्यदूत श्रेष्ठले नेपाल र भियतनामबीच सिधा हवाई उडान सञ्चालन गरिनुपर्नेमा जोड दिए । यसले बौद्ध पर्यटन, व्यापार, लगानी र सांस्कृतिक सम्बन्धलाई नयाँ उचाइमा पुर्याउने उनले बताए ।

उनले नेपाल बुद्धको जन्मस्थल तथा भियतनाम समृद्ध बौद्ध सम्पदा र ठूलो बौद्ध समुदाय भएको मुलुक भएकाले दुई देशबीचको धार्मिक तथा सांस्कृतिक सम्बन्ध थप मजबुत बनाउन प्रत्यक्ष हवाई सम्पर्क अत्यन्त आवश्यक रहेको औँल्याए ।

Originally published on abcnews.com.np.