महोत्तरी । महोत्तरीको बर्दिबास नगरपालिका–३ कालापानीमा आन्दोलनका कारण अवरुद्ध भएको बीपी राजमार्ग आन्दोलनरत पक्षसँग मौखिक सहमतिपछि पुनः सञ्चालनमा आएको छ।

शनिबार बिहानदेखि स्थानीयवासीले राजमार्ग अवरुद्ध गरेका थिए। महोत्तरीका प्रमुख जिल्ला अधिकारी इन्द्रदेव यादव र जिल्ला प्रहरी कार्यालयका प्रहरी उपरीक्षक श्यामकुमार सारुमगर घटनास्थल पुगेर आन्दोलनरत पक्षसँग छलफल गरेपछि सडक खुलाइएको हो।

स्थानीयवासीले कालापानी वन प्रकरणमा चार जनामाथि झुटा मुद्दा दर्ता गरिएको भन्दै आन्दोलन गरेका हुन्। यसअघि बसेको सर्वदलीय बैठकले आरोपितहरू निर्दोष रहेको निष्कर्ष निकाल्दै तीन दिनभित्र मुद्दा फिर्ता लिन स्थानीय प्रशासनलाई अल्टिमेटम दिएको थियो। माग सम्बोधन नभएपछि शनिबारदेखि आन्दोलन सुरु गरिएको थियो।

गत जेठ ११ गते वन कर्मचारी बस्ती खाली गराउने सूचना लिएर पुगेपछि स्थानीयसँग विवाद भएको थियो। त्यसक्रममा डिभिजन वन कार्यालयको सरकारी गाडीमा आगजनीसमेत भएको थियो। घटनापछि स्थानीय प्रशासनसँग भएको सहमतिमा घटनाको जिम्मेवारी सरकारले लिने, घाइतेको उपचार राज्यले गर्ने तथा कसैविरुद्ध मुद्दा नचलाउने उल्लेख गरिएको थियो। तर त्यसपछि प्रहरीले मुद्दा दर्ता गरी अनुसन्धान अघि बढाएपछि स्थानीयवासी पुनः आन्दोलनमा उत्रिएका हुन्।

प्रमुख जिल्ला अधिकारी यादवका अनुसार आन्दोलनरत पक्षसँग मौखिक सहमति भएपछि अहिले बीपी राजमार्गमा सवारीसाधन सञ्चालन सामान्य बनेको छ।

Originally published on abcnews.com.np.