काठमाडौं । संघीय संसद्अन्तर्गत राष्ट्रियसभाको बैठक आज (बिहीबार) बस्दैछ। सिंहदरबारस्थित संसद् भवनमा अपराह्न १ः१५ बजे सुरु हुने बैठकमा विभिन्न मन्त्रालयसँग सम्बन्धित प्रश्न–उत्तर, ध्यानाकर्षण प्रस्ताव तथा विधेयक प्रस्तुत गर्ने कार्यसूची रहेको छ।

संघीय संसद् सचिवालयका अनुसार बैठकमा गृहमन्त्री सुधन गुरुङले गृह मन्त्रालयसँग सम्बन्धित सांसदहरूले उठाएका मौखिक प्रश्नको उत्तर दिने सम्भावित कार्यसूची छ।

त्यसैगरी महिला, बालबालिका, लैङ्गिक तथा यौनिक अल्पसंख्यक तथा सामाजिक सुरक्षामन्त्री सिता बादीले पनि आफ्नो मन्त्रालयसँग सम्बन्धित मौखिक प्रश्नहरूको जवाफ दिनेछिन्।

बैठकमा राष्ट्रियसभा सदस्य कमला पन्तले ‘मनसुनजन्य विपद् व्यवस्थापनमा सरकारको पूर्वतयारी’ सम्बन्धमा गृहमन्त्रीको ध्यानाकर्षण गराउने प्रस्ताव प्रस्तुत गर्ने कार्यक्रम रहेको छ। हाल देशका विभिन्न क्षेत्रमा निरन्तर वर्षा, बाढी र पहिरोको जोखिम बढिरहेका बेला यो विषयले विशेष महत्व पाएको छ।

यसैगरी कृषि, वन तथा पर्यावरणमन्त्री गीता चौधरीले ‘सङ्क्रामक पशु रोग (नियन्त्रण) विधेयक, २०८३’ राष्ट्रियसभासमक्ष प्रस्तुत गर्ने कार्यसूची रहेको संघीय संसद् सचिवालयले जनाएको छ।

आजको बैठकमा सरकारका विभिन्न मन्त्रालयका कामकारबाही, विपद् व्यवस्थापनको तयारी तथा पशु स्वास्थ्यसँग सम्बन्धित कानुनी व्यवस्थाबारे छलफल हुने अपेक्षा गरिएको छ।

Originally published on abcnews.com.np.