काठमाडौं । मेक्सिकोको सिनालोआ राज्यमा लोकप्रिय सामाजिक सञ्जाल इन्फ्लुएन्सर सेसर गास्टेलमको टिकटक लाइभस्ट्रिमकै क्रममा गोली हानी हत्या गरिएको छ। घटनाले मेक्सिकोमा बढ्दो हिंसा र सार्वजनिक व्यक्तिहरूमाथि हुने आक्रमणबारे फेरि चिन्ता बढाएको छ।

प्रहरीका अनुसार करिब ६ लाख टिकटक फलोअर्स रहेका २५ वर्षीय गास्टेलम साथीहरूसँग भिडियो सामग्री तयार गर्दै एक फास्टफुड रेस्टुरेन्टबाहिर लाइभस्ट्रिम गरिरहेका थिए। उनीहरू सामाजिक सञ्जालमा चलिरहेको एक च्यालेन्जका लागि डेलिभरी ड्राइभरको पोसाकमा देखिएका थिए।

यही क्रममा मोटरसाइकलमा आएका दुई आक्रमणकारीमध्ये पछाडि बसेका व्यक्तिले गास्टेलममाथि नजिकबाट गोली प्रहार गरेका थिए। गोली लागेपछि उनी घटनास्थलमै ढलेका थिए र केहीबेरमै लाइभस्ट्रिम बन्द भएको थियो।

घटनाको भिडियो सामाजिक सञ्जालमा तीव्र रूपमा फैलिएको भए पनि स्थानीय सुरक्षा अधिकारीहरूले त्यसको आधिकारिक पुष्टि गरेका छैनन्। सिनालोआ राज्यका सुरक्षा निकायले भने गास्टेलमको मृत्यु भएको पुष्टि गर्दै घटनाबारे अनुसन्धान सुरु गरिएको जनाएको छ।

प्रहरीले आक्रमणको उद्देश्य र संलग्न व्यक्तिहरूको पहिचान गर्ने प्रयास भइरहेको जनाएको छ। हालसम्म कसैले पनि घटनाको जिम्मेवारी लिएको छैन।

सिनालोआ मेक्सिकोको हिंसात्मक अपराध प्रभावित क्षेत्रमध्ये एक मानिन्छ। त्यहाँ संगठित अपराध समूहबीच हुने द्वन्द्वका कारण हत्या र सशस्त्र आक्रमणका घटना पटक–पटक हुने गरेका छन्।

यस घटनाले सामाजिक सञ्जालमार्फत सार्वजनिक रूपमा सक्रिय व्यक्तिहरूको सुरक्षाबारे पनि नयाँ बहस सुरु गराएको छ। बीबीसीका अनुसार अनुसन्धान जारी रहेको छ।

Originally published on abcnews.com.np.