बागलुङ । घरमाथिबाट निरन्तर पहिरो खस्न थालेपछि बागलुङ नगरपालिका–६ उपल्लाथरका एक परिवारलाई सुरक्षित स्थानमा स्थानान्तरण गरिएको छ।

भान्सा गाउँको शिरस्थित धुलेओडारबाट खसेको पहिरोका कारण उपल्लाथरका मणिशंकर सापकोटा र विद्यापति सापकोटाको घर उच्च जोखिममा परेपछि नेपाल प्रहरी, नगर प्रहरी र स्थानीयबासीको सहकार्यमा मणिशंकर सापकोटाको परिवारलाई छिमेकी दशरथ सापकोटाको घरमा सारिएको हो।

बागलुङ नगरपालिका–६ का वडाध्यक्ष रुद्र केसीका अनुसार निरन्तर वर्षासँगै पहिरो खस्ने क्रम नरोकिएकाले थप जोखिम हुन नदिन परिवारलाई तत्काल सुरक्षित स्थानमा सारिएको हो। उहाँका अनुसार विद्यापति सापकोटाको घर पनि पहिरोको जोखिममा परे पनि त्यहाँ हाल बसोबास भने छैन।

करिब १२० मिटर माथिबाट खसिरहेको पहिरो तत्काल नियन्त्रण गर्ने अवस्था नरहेको वडाध्यक्ष केसीले बताए। वर्षा कम भएपछि मात्रै पहिरो नियन्त्रण तथा जोखिम न्यूनीकरणका उपायबारे योजना बनाउन सकिने उहाँको भनाइ छ।

जिल्ला प्रहरी कार्यालय बागलुङका प्रहरी नायव उपरीक्षक रामेश्वर त्वातीले पहिरोका कारण जोखिममा परेको घरबाट खाद्यान्न, लत्ताकपडा, भाँडाकुँडा तथा अन्य महत्वपूर्ण सामग्री सुरक्षित स्थानमा सार्ने काम प्रहरी र स्थानीयबासीको सहकार्यमा भइरहेको जानकारी दिए।

निरन्तर वर्षासँगै जिल्लाका विभिन्न क्षेत्रमा पहिरोको जोखिम बढेकाले स्थानीय प्रशासनले जोखिमयुक्त स्थानमा बसोबास गर्ने नागरिकलाई सतर्क रहन र आवश्यक परे सुरक्षित स्थानमा सर्न आग्रह गरेको छ।

Originally published on abcnews.com.np.