काठमाडौं । सिद्धार्थ राजमार्गअन्तर्गत पाल्पाको तानसेन–बुटवल सडकखण्डमा सुक्खा पहिरो खस्दा सडक पूर्ण रूपमा अवरुद्ध भएको छ। सडक अवरुद्ध भएपछि सयौँ सवारीसाधन बीच बाटोमै रोकिएका छन् भने यात्रुहरू गन्तव्यतर्फ जान सकेका छैनन्।

जिल्ला प्रहरी कार्यालय पाल्पाका अनुसार बिहीबार बिहान करिब ११ः३० बजे तानसेन–बुटवल सडकखण्डको गौडेपुलनजिकै सुक्खा पहिरो खसेपछि सडक अवरुद्ध भएको हो। गएरातिको अविरल वर्षापछि बिहान पहिरो खसेको प्रहरीले जनाएको छ।

सडक डिभिजन कार्यालय पाल्पाले सडक खुलाउने प्रयास भइरहेको जनाएको छ। कार्यालयका सूचना अधिकारी महेश्वर लम्सालका अनुसार पहिरो पन्छाउन प्रयोग गरिएको एउटा डोजरको टायर पञ्चर भएपछि काम प्रभावित भएको छ। अहिले अर्को डोजर ल्याएर पहिरो हटाउने तयारी भइरहेको उनले बताए।

गौडेपुल क्षेत्र प्रत्येक वर्ष सुक्खा पहिरोको उच्च जोखिममा पर्ने स्थान हो। तानसेन–८ स्थित डाँडाबाट गेग्रानसहितको पहिरो खस्ने क्रम दोहोरिने गरेको सडक डिभिजन कार्यालयले जनाएको छ।

कार्यालयका अनुसार पहिरो नियन्त्रणका लागि विभिन्न प्रयास भए पनि सिद्धार्थ राजमार्गभन्दा करिब दुई मिटर माथिबाट पहिरो खस्ने भएकाले दीर्घकालीन व्यवस्थापन चुनौतीपूर्ण बन्दै आएको छ।

Originally published on abcnews.com.np.