काठमाडौँ,  । ३२औँ विश्व आदिवासी दिवसको अवसरमा आइतबार विभिन्न कार्यक्रम आयोजना गरि मनाइएको छ ।

‘प्राप्त अधिकारको रक्षा आजको आवश्यकता, पहिचानसहितको समावेशी र न्यायपूर्ण नेपाल निर्माणमा हाम्रो साझा प्रतिबद्धता’ भन्ने मूल नारासहित साताब्यापी रुपमा दिवस मनाइन लागिएको हो ।

यस दिवसमा ‘आदिवासी सुडेनीहरूको सम्मानः जीवन र कल्याणको संरक्षण’ भन्ने विश्व नाराका साथ देशभरि विभिन्न कार्यक्रम गरी यो दिवस मनाइएको छ ।

यस अवसरमा नेपाल आदिवासी जनजाति महासङ्घको नेतृत्वमा काठमाडौँमा झाँकीसहितको र्याली निकालिएको छ । गुरुङ, मगर, थारु, नेवार, तामाङ, राई, लिम्बूलगायत ५९ जातीय संस्थाहरुले आफ्नो ब्यानरसहित र्याली निकालेका छन् । र्यालीमा सहभागीहरु परम्परात पोशाकमा सजिएका छन् ।

भृकुटीमण्डपबाट निकालिएको र्याली भद्रकाली, सहिदगेट हुँदै औपचारिक कार्यक्रम स्थल खुलामञ्च पुगेर मूल समारोहमा परिणत भएको छ ।  महासङ्घले खुलामञ्चमा आयोजना गरेको कार्यक्रमलाई उपराष्ट्रपति रामसहाय प्रसाद यदवले उद्घाटन तथा सम्बोधन गर्नु हुनेछ ।

कार्यक्रममा चर्चित सांगीतिक समूह कुटुम्बको प्रस्तुति पनि रहनेछ । यस्तै विभिन्न जातजातिको परम्परागत सांस्कृतिक गित तथा नृत्य प्रस्तुत हुने र जातिय खानाका परिकारको प्रदर्शनी पनि रहेको छ ।

Originally published on abcnews.com.np.