काठमाडौं । सामान्यतया विमान उडान रद्द हुनुका पछाडि खराब मौसम, प्राविधिक समस्या वा अन्य आकस्मिक कारण हुने गर्छन्। तर क्यानडामा भने एक बच्चाले सिट बेल्ट बाँध्न नमानेपछि विमानको उडान नै रद्द गर्नुपरेको छ।

घटना क्यानडाको ब्रिटिस कोलम्बियास्थित भिक्टोरिया इन्टरनेसनल एयरपोर्टको हो। भिक्टोरियाबाट टोरोन्टोका लागि उड्न लागेको पोर्टर एयरलाइन्सको विमानमा सवार एक बच्चाले सिट बेल्ट बाँध्न अस्वीकार गरेपछि विमानलाई पुनः टर्मिनलमा फर्काइएको थियो।

एयरलाइन्सका अनुसार विमान टर्मिनलबाट रनवेतर्फ अघि बढिरहेका बेला चालक दलका सदस्यहरूले बच्चा आफ्नो सिटमा उभिएको र सिट बेल्ट बाँध्न नमानेको देखेका थिए।

बच्चाका आमाबाबु र चालक दलका सदस्यहरूले पटक–पटक सम्झाउँदै उसलाई सुरक्षित रूपमा सिटमा बसाउन तथा सिट बेल्ट बाँध्न लगाउने प्रयास गरे पनि बच्चाले अटेर गरेको थियो। अन्ततः सुरक्षा नियम पालना नभएपछि विमानलाई उडान भर्न नसकिने निर्णय गरिएको थियो।

सबै यात्रुलाई विमानबाट ओरालियो

पोर्टर एयरलाइन्सका अनुसार उडानका क्रममा बालबालिकालाई सुरक्षित रूपमा सिटमा राखेर सिट बेल्ट बाँधिएको सुनिश्चित गर्नुपर्ने हुन्छ। त्यसैले चालक दलले विमानलाई पुनः टर्मिनलमा फर्काउने निर्णय गरेका थिए।

विमान टर्मिनलमा पुगेपछि सबै यात्रुलाई ओरालिएको थियो। त्यसपछि बच्चा र उसका आमाबाबुको सामान विमानबाट निकाल्ने, पुनः उडानको व्यवस्था मिलाउने तथा आवश्यक प्रक्रिया पूरा गर्न समय लागेको थियो।

यसबीच भिक्टोरिया इन्टरनेसनल एयरपोर्टको रनवे बन्द हुने समयसमेत नजिकिएको थियो। विमानस्थलको रनवे राति १२ः३० बजेपछि बन्द हुने भएकाले आवश्यक प्रक्रिया पूरा गर्दासम्म उक्त समय पार भइसकेको थियो।

त्यसपछि पोर्टर एयरलाइन्सको पीडी ४४४ उडान सोही राति टोरोन्टोका लागि सञ्चालन हुन सकेन। विमानमा सवार यात्रुहरूलाई भिक्टोरियामै रात बिताउनुपर्ने अवस्था आएको थियो।

भोलिपल्ट मात्र टोरोन्टो पुग्यो विमान

एयरलाइन्सले यात्रुलाई परेको असुविधाप्रति क्षमायाचना गर्दै उनीहरूलाई भोलिपल्टको उडानबाट गन्तव्यतर्फ पठाउने व्यवस्था मिलाएको थियो।

उडान ट्र्याकिङ वेबसाइट ‘फ्लाइटअवेयर’का अनुसार पीडी ४४४ शुक्रबार राति १०ः४९ बजे भिक्टोरियाबाट उडेको थियो र भोलिपल्ट बिहान ६ः१६ बजे टोरोन्टो पुगेको थियो।

एउटा बच्चाले सिट बेल्ट बाँध्न नमानेको सामान्य देखिने घटनाले विमानमा सवार सबै यात्रुको यात्रा प्रभावित भएपछि यो घटना सामाजिक सञ्जालमा समेत चर्चाको विषय बनेको छ।

Originally published on abcnews.com.np.