काठमाडौं । नेपाली कांग्रेसको महाधिवेशन प्रक्रिया रोक्न माग गर्दै संस्थापन इतर पक्ष सर्वोच्च अदालत जाने तयारीमा जुटेको छ। पूर्वसभापति शेरबहादुर देउवा र कार्यवाहक सभापति पूर्णबहादुर खड्काका तर्फबाट रिट दायर गर्ने तयारी गरिएको हो।

कांग्रेसको विशेष महाधिवेशनलाई निर्वाचन आयोगले वैधता दिएपछि देउवा र खड्काले दायर गरेको रिटमा सर्वोच्च अदालतको संयुक्त इजलासले आयोगकै पक्षमा फैसला गरेको थियो। उक्त फैसलाविरुद्ध उनीहरूले सर्वोच्चमा पुनरवलोकन निवेदन दिएका थिए।

पुनरवलोकन निवेदनमाथि सुनुवाइका लागि सर्वोच्चको पूर्ण इजलासले अनुमति दिइसकेको अवस्थामा महाधिवेशन प्रक्रिया अघि बढाउन नमिल्ने जिकिरसहित देउवा–खड्का पक्ष फेरि सर्वोच्च जान लागेको हो।

महाधिवेशन रोक्न रिट दायर गर्ने विषयमा आइतबार खड्का निवास हात्तीगौंडामा नेताहरू तथा निकट कानुन व्यवसायीसँग छलफल भएको थियो। छलफलपछि रिटको मस्यौदा तयार गर्ने जिम्मेवारी एक वरिष्ठ अधिवक्तालाई दिइएको बताइएको छ।

देउवा निकट एक कानुन व्यवसायीका अनुसार रिट दायर गर्ने तयारी भइरहेको छ। समयले साथ दिए मंगलबार नभए बुधबार सर्वोच्चमा रिट दर्ता गर्ने तयारी रहेको उनको भनाइ छ।

देउवा–खड्का पक्षले पुनरवलोकनको टुंगो नलागेसम्म महाधिवेशनसम्बन्धी प्रक्रिया अघि बढाउँदा विचाराधीन मुद्दा प्रभावित हुन सक्ने दाबी गरेको छ। तत्काल महाधिवेशन प्रक्रिया रोक्न अन्तरिम आदेश र अन्तिममा निर्वाचन आयोगको निर्णय उल्ट्याउन परमादेश माग गर्ने तयारी रहेको बताइएको छ।

यसअघि सर्वोच्चको पूर्ण इजलासले साउन २१ गते पुनरवलोकनका लागि निस्सा प्रदान गरेको थियो। त्यसअघि वैशाख ४ गते संयुक्त इजलासले कांग्रेसको विशेष महाधिवेशन तथा गगनकुमार थापाको नेतृत्वलाई वैधता दिएको थियो।

यता कांग्रेस संस्थापन पक्षले भने निर्धारित कार्यतालिकाअनुसार १५औँ महाधिवेशन गर्ने तयारी अघि बढाइसकेको छ। कांग्रेसको आगामी महाधिवेशन असोज १६ देखि १९ गतेसम्म काठमाडौंमा गर्ने कार्यतालिका तय भएको छ। वडा तहको अधिवेशन भदौ २ गतेदेखि सुरु हुने जनाइएको छ।

Originally published on abcnews.com.np.