काठमाडौं । इरानी राष्ट्रपति मसुद पेजेस्कियनले सर्वोच्च नेता आयतल्लाह मुज्तबा खामेनेईसँग करिब सात घण्टा लामो भेटवार्ता भएको बताएका छन्। सोमबार भएको भेटवार्ता कहाँ भएको थियो भन्नेबारे भने उनले स्पष्ट खुलाएका छैनन्।

गत मार्चमा खामेनेई सर्वोच्च नेता नियुक्त भएपछि राष्ट्रपति पेजेस्कियनले उनीसँग भेट गरेको यो दोस्रोपटक हो। अमेरिकी–इजरायली आक्रमणमा आफ्ना पिताको मृत्यु भएपछि मुज्तबा खामेनेई सर्वोच्च नेताको पदमा पुगेका हुन्। सोही आक्रमणमा उनी घाइते भएको अनुमान गरिएपछि त्यसयता सार्वजनिक रूपमा देखिएका छैनन्।

राष्ट्रपति पेजेस्कियनका अनुसार भेटमा जनताको जीविकोपार्जन, बजारको अवस्था, रोजगारी र आवासलगायत विषयमा छलफल भएको थियो। अन्तर्राष्ट्रिय प्रतिबन्धका कारण उत्पन्न समस्याबारे पनि उनीहरूबीच कुराकानी भएको उनले राज्य सञ्चालित सञ्चारमाध्यम आईआरआईबीलाई बताएका छन्।

भेटमा सर्वोच्च नेता खामेनेईले राष्ट्रिय एकतामा विशेष जोड दिएको पेजेस्कियनले बताए।

“शत्रुका सबै योजनाहरू विभाजन सिर्जना गर्ने उद्देश्यले प्रेरित छन्। हामीले कुनै पनि प्रकारको विभाजन उत्पन्न हुन दिनु हुँदैन,” पेजेस्कियनले भने।

Originally published on abcnews.com.np.