काठमाडौं । फर्स्ट माइक्रोफाइनान्स वित्तीय संस्था लिमिटेड र महिला लघुवित्त वित्तीय संस्था लिमिटेडबीच मर्जर प्रक्रिया अघि बढाउने उद्देश्यले प्रारम्भिक समझदारीपत्रमा हस्ताक्षर भएको छ ।

सोमबार दुवै संस्थाका प्रतिनिधिले मर्जरसम्बन्धी प्रारम्भिक समझदारीपत्रमा हस्ताक्षर गरेका हुन् । समझदारीसँगै मर्जर प्रक्रियालाई व्यवस्थित रूपमा अघि बढाउन दुवै संस्थाले आवश्यक तयारी सुरु गरेका छन् ।

फर्स्ट माइक्रोफाइनान्सको केन्द्रीय कार्यालय काठमाडौंको ज्ञानेश्वरमा छ भने महिला लघुवित्तको कार्यालय काभ्रेको बनेपास्थित साँगामा रहेको छ ।

आधारभूत शेयरधनीको कारोबार रोक्का गर्न आग्रह

मर्जर प्रक्रियाकै क्रममा फर्स्ट माइक्रोफाइनान्सले नेपाल धितोपत्र बोर्डको निर्देशिकाबमोजिम आधारभूत शेयरधनीहरूको शेयर कारोबार रोक्का राख्न नेपाल स्टक एक्सचेन्ज (नेप्से)लाई आग्रह गरेको छ ।

कम्पनीले वार्षिक साधारणसभा सम्पन्न नभएसम्म आधारभूत शेयरधनीहरूको शेयर कारोबार रोक्का राखिदिन नेप्सेलाई पत्राचार गरेको हो ।

मर्जर प्रक्रियालाई सहज बनाउन तथा शेयरधनीहरूको हित संरक्षण गर्ने उद्देश्यले कारोबार रोक्काको आग्रह गरिएको कम्पनीले जनाएको छ । आवश्यक कानुनी प्रक्रिया पूरा गरी मर्जरको अन्तिम सम्झौता गर्ने तयारी भइरहेको कम्पनीको भनाइ छ ।

Originally published on abcnews.com.np.