काठमाडौं । एनएमबि बैंक लिमिटेडले दोस्रो नाइमा नेपाल मोबिलिटी एक्स्पोलाई लक्षित गर्दै नयाँ विद्युतीय सवारीसाधन खरिदका लागि ‘इभी अटो कर्जा’ योजना सार्वजनिक गरेको छ।

बैंकका अनुसार वातावरणमैत्री यातायात प्रवर्द्धन तथा दिगो बैंकिङलाई प्रोत्साहन गर्ने उद्देश्यले ल्याइएको उक्त कर्जा योजना आधार दरमा ०.५ प्रतिशत थप गरी ब्याजदर निर्धारण हुने गरी ल्याइएको हो। यो योजना सीमित अवधिका लागि लागू हुने बैंकले जनाएको छ।

नयाँ विद्युतीय सवारीसाधन खरिद गर्न इच्छुक ग्राहकले काठमाडौंको भृकुटीमण्डपमा जारी नाइमा नेपाल मोबिलिटी एक्स्पोमा रहेको बैंकको स्टल नम्बर ५ तथा देशभरका एनएमबि बैंकका शाखामार्फत कर्जाका लागि आवेदन दिन सक्नेछन्।

विद्युतीय सवारी खरिदमा सहजीकरण

बैंकले नयाँ विद्युतीय सवारीसाधन खरिदकर्तालाई सरल र छिटो प्रक्रियामार्फत कर्जा उपलब्ध गराउने जनाएको छ। विद्युतीय सवारीको बढ्दो माग र वातावरणमैत्री यातायातप्रतिको आकर्षणलाई ध्यानमा राख्दै कर्जा योजना ल्याइएको बैंकको भनाइ छ।

एनएमबि बैंकले हाल देशभर १९८ शाखा, १७६ एटिएम तथा एक्सटेन्सन काउन्टरहरू मार्फत बैंकिङ सेवा प्रदान गर्दै आएको जनाएको छ।

नाइमा नेपाल मोबिलिटी एक्स्पोमा विद्युतीय तथा हाइब्रिड सवारीसाधनका नयाँ मोडलहरू सार्वजनिक भइरहेका बेला बैंकको इभी कर्जा योजनाले विद्युतीय सवारी खरिद गर्न चाहने ग्राहकलाई वित्तीय सुविधा उपलब्ध गराउने अपेक्षा गरिएको छ।

Originally published on abcnews.com.np.