काठमाडौं । नेपाल यातायात व्यवसायी राष्ट्रिय महासंघका अध्यक्ष पुण्यप्रसाद सिटौला (सरोज)ले विद्युतीय सवारीसाधन (ईभी) क्षेत्रमा लगानी सुरक्षाका लागि कम्तीमा १० वर्षसम्म नीतिगत स्थिरता कायम गर्न सरकारसँग माग गरेका छन्।

मंगलबार काठमाडौंमा सुरु भएको ‘नाइमा नेपाल मोबिलिटी एक्स्पो’को उद्घाटन कार्यक्रममा बोल्दै अध्यक्ष सिटौलाले सरकार र कर्मचारी परिवर्तनसँगै नीतिसमेत परिवर्तन हुँदा व्यवसायी समस्यामा पर्ने गरेको बताए। उनले ईभी क्षेत्रमा दीर्घकालीन लगानी सुनिश्चित गर्न न्यायपूर्ण र स्थिर कानुनी व्यवस्था आवश्यक रहेको उल्लेख गरे।

सिटौलाले सार्वजनिक सवारी सञ्चालनको अनुमति दिनुअघि रुटको वैज्ञानिक अध्ययन र यात्रुको संख्याबारे सर्वेक्षण गर्नुपर्ने बताए। सार्वजनिक यातायातको भाडादर पनि राजनीतिक निर्णयका आधारमा नभई वास्तविक लागत र उचित प्रतिफलका आधारमा वैज्ञानिक रूपमा निर्धारण गर्नुपर्ने उनको भनाइ छ।

चार्जिङ स्टेसन विस्तारमा सरकारी लगानी माग

ईभीको प्रयोग बढाउन देशभरका प्रत्येक पेट्रोल पम्पमा अनिवार्य रूपमा चार्जिङ स्टेसन निर्माण गर्ने नीति ल्याउनुपर्ने सिटौलाले बताए। ग्रामीण क्षेत्रसम्म चार्जिङ नेटवर्क विस्तारका लागि सरकारले अनुदानसहित लगानीमैत्री वातावरण बनाउनुपर्ने उनको माग छ।

उनले संघ र प्रदेश सरकारबीच भाडादर तथा यातायातसम्बन्धी नीतिमा समन्वय नहुँदा निजी क्षेत्र समस्यामा परेको भन्दै एकद्वार प्रणालीबाट स्पष्ट नीति ल्याउन आग्रह गरे।

पार्टपुर्जा र ब्याट्रीको मूल्यमा चिन्ता

सिटौलाले विद्युतीय सवारीका पार्टपुर्जा तथा ब्याट्री महँगो हुनुका साथै सहज रूपमा उपलब्ध नहुँदा व्यवसायी प्रभावित भएको बताए।

खुला सीमाबाट नक्कली पार्टपुर्जा भित्रिने र त्यसले दुर्घटनाको जोखिम बढाउने भन्दै उनले त्यस्ता सामग्रीको आयातमा कडाइ गर्न सरकारसँग आग्रह गरे। सार्वजनिक सवारीका पार्टपुर्जा आयातमा सहुलियत दिनुपर्ने विषयमा आफूले अर्थमन्त्रीसँग छलफल गरेको पनि उनले जानकारी दिए।

ईभीमा ब्याट्रीको आयु, लागत र सुरक्षासम्बन्धी विषय लगानीकर्ताका लागि चुनौतीपूर्ण रहेको भन्दै उनले यसका लागि स्पष्ट मापदण्ड र नीतिगत व्यवस्था आवश्यक रहेको बताए।

सिटौलाले नीतिगत स्थिरता, चार्जिङ पूर्वाधार र आवश्यक कानुनी व्यवस्था सुनिश्चित भएमा मात्रै विद्युतीय सवारी क्षेत्रमा लगानी सुरक्षित र दीर्घकालीन रूपमा विस्तार हुने बताए।

Originally published on abcnews.com.np.