नारायणगढ, साउन २६ गते । चितवन राष्ट्रिय निकुञ्जको मध्यवर्ती क्षेत्रमा बाघको आक्रमणबाट एक जनाको मृत्यु भएको छ।

पश्चिम चितवनको मेघौलीस्थित हरियाली सामुदायिक वनमा एक पुरुषको शव भेटिएको हो। शव भेटिएको स्थाननजिकै बाघसमेत रहेकाले हात्ती प्रयोग गरी बाघलाई धपाएर शव नियन्त्रणमा लिने प्रयास भइरहेको चितवन राष्ट्रिय निकुञ्जका सूचना अधिकारी अविनाश मगरले जानकारी दिए।

मृतकको पहिचान औपचारिक रूपमा हुन बाँकी रहेको छ। स्थानीयवासीका अनुसार भरतपुर महानगरपालिका–२८, जितपुर निवासी ६१ वर्षीय मगले बोटे सम्पर्कविहीन थिए। उनी सोही सामुदायिक वनमा घाँस काट्न गएको बताइएको छ।

संरक्षणकर्मीहरूले घाँस काट्न वनमा गएका बोटेलाई बाघले आक्रमण गरेको हुन सक्ने अनुमान गरेका छन्।

घटनास्थलमा खोजी तथा उद्धारका लागि हात्तीसहितको प्राविधिक टोली परिचालन गरिएको छ। टोलीले बाघको सम्भावित जोखिमबाट मानिसलाई सुरक्षित दूरीमा राख्दै शव नियन्त्रणमा लिने तथा मृतकको पहिचान गर्ने काम गरिरहेको छ।

निकुञ्जका अनुसार घटनाको थप अनुसन्धान तथा मृतकको औपचारिक सनाखतपछि घटनाबारे विस्तृत विवरण सार्वजनिक गरिनेछ।

Originally published on abcnews.com.np.