काठमाडौं । काठमाडौं उपत्यकाको अधिकतम तापक्रम सन् २०२६ लागेयताकै उच्च विन्दुमा पुगेको छ।
जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार मंगलबार (अगस्ट ११) उपत्यकाको अधिकतम तापक्रम ३२.३ डिग्री सेल्सियस मापन भएको हो।
महाशाखाका मौसमविद् सञ्जीव अधिकारीका अनुसार यो तापक्रम सन् २०२६ लागेयता काठमाडौं उपत्यकामा मापन भएको सबैभन्दा उच्च तापक्रम हो।
यसअघि जुन २७ मा उपत्यकाको अधिकतम तापक्रम ३१.७ डिग्री सेल्सियस पुगेको थियो। मंगलबारको तापक्रम त्यसभन्दा ०.६ डिग्री सेल्सियस बढी हो।
मनसुनमा किन बढ्यो तापक्रम ?
मौसमविद् अधिकारीका अनुसार सामान्यतया काठमाडौंमा सबैभन्दा बढी गर्मी प्रिमनसुन अवधिमा हुने गर्छ। तर यस वर्ष मनसुन अवधिमा अपेक्षाकृत कम बादल र वर्षा भएकाले तापक्रम बढेको हो।
यस वर्षको प्रिमनसुन अवधिमा काठमाडौं उपत्यकाको अधिकतम तापक्रम मे २३ मा ३०.७ डिग्री सेल्सियस पुगेको थियो।
मंगलबारको ३२.३ डिग्री सेल्सियस तापक्रम त्यसको तुलनामा पनि १.६ डिग्री सेल्सियस बढी हो।
Originally published on abcnews.com.np.
प्रतिक्रिया दिनुहोस्