झापा, ३० चैत । झापाको दमकमा प्रहरी र विधार्थीबिच झडप हुँदा आधा दर्जन बढि विधार्थी घाइते भएका छन् । यातायात मजदुरले गाडीमा चढ्न नदिएको तथा दुव्र्यवहार गरेको भन्दै दमक बहुमुखी क्याम्पसका विद्यार्थी विरोधमा उत्रिएका थिए ।

झडपका क्रममा प्रहरीको लाठी प्रहारबाट स्वतन्त्र विद्यार्थी यूनियन दमक क्याम्पसका सभापति विनोद चापागाई, सचिव रोशन भण्डारीसहित आधा दर्जन विद्यार्थी घाइते भएको अखिल क्रान्तिकारीका लोचन पोखरेलले बताए ।

विद्यार्थीको ढुंगा प्रहारबाट ना ६ ख ४१६२ नम्बरको ट्रकमा क्षति पुगेको छ । सरकारले दिएको छुट अनुसार यातायात मजदुरले विद्यार्थीलाई गाडीमा चढ्न नदिएपछि क्याम्पस जानआउन गाह्रो भएको विरोधमा आन्दोलनमा उत्रिनु परेको स्ववियु सभापति चापागाईले बताए ।

गत चैत २३ गते स्ववियु पदाधिकारी, यातायात व्यवसायी र प्रहरीबीच सरकारी छुट अनुसार ४५ प्रतिशत सहुलियतमा विद्यार्थीलाई गाडीमा चढ्न दिने सहमति जुटे पनि एक हप्तापनि पालना नगरेको उनले बताए ।

क्याम्पस पोसाकमै सडकमा उत्रिएका विद्यार्थीले दिउँसो दुई घण्टा पूर्वपश्चिम राजमार्गमा चक्काजाम गरेका थिए । दुई घण्टासम्म पनि विद्यार्थीले चक्काजाम खोल्न नमानेपछि प्रहरीले बल प्रयोग गरेर सडक खुलाएको हो । सोहि क्रममा विद्यार्थीले प्रहरीमाथि ढुंगा प्रहार गरेको इलाका प्रहरी कार्यालय दमकमा प्रहरी निरीक्षक मिलन बस्नेतले बताए ।