काठमाडौं, १० असार । नेपाली फुटबलका पूर्वकप्तान तथा अखिल नेपाल फुटबल संघ (एन्फा)का पूर्वउपाध्यक्ष, राष्ट्रिय गोलकिपर प्रशिक्षक उपेन्द्रमान सिंहले फिफा विश्वकप–२०२६ ले विश्व फुटबलको नयाँ दिशा देखाइरहेको बताउँदै नेपाली फुटबलले पनि त्यसबाट पाठ सिक्नुपर्ने बताउनुभएको छ।

एबीसी स्पोर्ट्स टकमा कविराज बिसीसँगको कुराकानीमा सिंहले विश्वकप केवल प्रतियोगिता नभई नयाँ प्रतिभा जन्माउने र आधुनिक फुटबलका प्रवृत्ति बुझ्ने महत्वपूर्ण अवसर भएको धारणा राख्नुभयो।

उहाँले Lionel Messi र Cristiano Ronaldoले उमेरले खेलाडीको क्षमता निर्धारण नगर्ने सन्देश दिएको उल्लेख गर्नुभयो। फिटनेस र निरन्तर मेहनतका कारण उनीहरू लामो समयसम्म उच्च स्तरमा खेल्न सफल भएको उहाँको भनाइ छ।

विश्व फुटबलमा प्रविधिको प्रयोग, भिडियो सहायक रेफ्री (VAR) प्रणाली र नयाँ नियमले खेललाई थप निष्पक्ष, आकर्षक र आधुनिक बनाएको उहाँले बताउनुभयो। फुटबललाई समयानुकूल बनाउन फिफाले निरन्तर नियम परिमार्जन गर्दै आएको पनि सिंहले उल्लेख गर्नुभयो।

युवा खेलाडी उत्पादनका सन्दर्भमा उहाँले विश्वकप उत्कृष्ट मञ्च भएको बताउँदै स्पेन, फ्रान्सलगायत राष्ट्रले दीर्घकालीन योजना बनाएर युवा प्रतिभा विकास गरिरहेको उदाहरण प्रस्तुत गर्नुभयो। नेपालमा पनि ग्रासरुट फुटबललाई प्राथमिकता दिन आवश्यक रहेको उहाँको भनाइ थियो।

नेपाली फुटबलको वर्तमान अवस्थाबारे टिप्पणी गर्दै सिंहले नियमित लिग, उमेर समूहका प्रतियोगिता र अन्तर्राष्ट्रिय स्तरका खेलहरूको अभावले फुटबलको लोकप्रियता घट्दै गएको बताउनुभयो। उहाँले एक समय दक्षिण एसियामा नेपालको प्रभावशाली उपस्थिति रहे पनि पछिल्ला वर्षमा फुटबल गतिविधि कमजोर बनेको धारणा राख्नुभयो।

रंगशाला पूर्वाधार, प्रतियोगिताको निरन्तरता र नेतृत्वको स्पष्ट दृष्टिकोण अभाव नेपाली फुटबलका मुख्य चुनौती भएको उहाँले औँल्याउनुभयो। साथै, अखिल नेपाल फुटबल संघ (एन्फा) भित्र देखिएको विवाद र राजनीतिक हस्तक्षेपले नेपाली फुटबललाई थप संकटतर्फ धकेल्न सक्ने चेतावनी पनि दिनुभयो।

उहाँले फुटबल विकासका लागि दीर्घकालीन योजना, नियमित प्रतियोगिता, युवा विकास कार्यक्रम र सक्षम नेतृत्व आवश्यक रहेकोमा जोड दिनुभयो।