रुकुम पश्चिम । रुकुम पश्चिममा आइतबार बिहान भएको सवारी दुर्घटनामा आमा र उनकी दुई वर्षीया छोरीको मृत्यु भएको छ।

सानीभेरी गाउँपालिका–८, एकान्तस्थित मध्यपहाडी लोकमार्गमा भे.१ ज १४८२ नम्बरको माइक्रोबसले ठक्कर दिँदा उनीहरूको मृत्यु भएको प्रहरीले जनाएको छ।

मृत्यु हुनेमा गुल्मीको रुरुक्षेत्र गाउँपालिका–४ बलेटक्चाकी २६ वर्षीया स्वस्तिका पौडेल र उनकी दुई वर्षीया छोरी शान्दिका रहेका छन्। उनीहरू रुकुम पश्चिमको सदरमुकाम मुसिकोटबाट गुल्मीतर्फ जाँदै थिए।

पिसाब फेर्न ओर्लिँदा दुर्घटना

प्रहरीका अनुसार स्वस्तिका र उनकी छोरी क.प्र.०२००१ ख १०७० नम्बरको गाडीमा सवार थिए। छोरीले पिसाब फेर्न बताएपछि आमाले गाडी रोकाएर उनीहरू सडकमा ओर्लिएका थिए।

सोही क्रममा तीव्र गतिमा आएको अर्को गाडीले उनीहरूलाई ठक्कर दिएको प्रहरीले जनाएको छ। दुर्घटना बिहान करिब ९ बजे भएको हो।

घटनाको जानकारी पाएपछि प्रहरी चौकी सिम्लीबाट प्रहरी नायब निरीक्षक धर्मबहादुर खड्काको नेतृत्वमा चार जनाको टोली घटनास्थल पुगेको थियो।

उपचारका क्रममा मृत्यु

दुर्घटनामा गम्भीर घाइते आमाछोरीलाई तत्काल उपचारका लागि सल्ले अस्पताल लगिएको थियो। तर चिकित्सकले दुवैलाई मृत घोषणा गरेका छन्।

ठक्कर दिने गाडीका चालक सानीभेरी गाउँपालिका–३, चौखेका २२ वर्षीय अम्मर विकलाई प्रहरीले नियन्त्रणमा लिएको छ।

घटनाबारे थप अनुसन्धान भइरहेको जिल्ला प्रहरी कार्यालयले जनाएको छ।

Originally published on abcnews.com.np.