रुपन्देही । नेकपा एमाले लुम्बिनी प्रदेशमा हालसम्म ५२ हजार पार्टी सदस्यले सदस्यता नवीकरण गरेका छन् । प्रदेश कमिटी अध्यक्ष राधाकृष्ण कंडेलका अनुसार प्रदेशका १२ जिल्लामा रहेका करिब ८० हजार सदस्यमध्ये ५२ हजारले सदस्यता नवीकरण गराएका हुन् ।

पार्टीले सदस्यता नवीकरणको समय पटकपटक थप गरे पनि इच्छुक सदस्यलाई आन्तरिक रूपमा निरन्तर नवीकरणको अवसर दिइरहेको छ । शनिबार बसेको प्रदेश कमिटी बैठकमा जिल्ला कमिटीका अध्यक्ष तथा इन्चार्जहरूले प्रस्तुत गरेको विवरणअनुसार ५२ हजार सदस्यले नवीकरण गरिसकेका छन् ।

बैठकले पार्टी पुनर्गठन तथा निर्वाचन समीक्षासम्बन्धी प्रतिवेदन सचिवालय हुँदै केन्द्रीय कमिटीमा छलफलका लागि लैजान पार्टी केन्द्रलाई आग्रह गरेको छ । समसामयिक विषयमा छलफल गरी पार्टीलाई थप गतिशील बनाउन तत्काल सचिवालय र केन्द्रीय कमिटी बैठक बोलाउन पनि माग गरिएको छ ।

अध्यक्ष कंडेलका अनुसार प्रदेश सभा दलको बैठक प्रत्येक महिना नियमित रूपमा बस्ने र छलफल गर्ने निर्णय भएको छ । जिल्ला तथा पालिका तहका जनप्रतिनिधिले पनि सम्बन्धित पार्टी कमिटीसँग नियमित समन्वय र छलफल गरेर अघि बढ्नुपर्ने निर्णय गरिएको छ ।

बैठकमा ‘मिसन पार्टी जागरण अभियान’को प्रारम्भिक समीक्षा गर्दै अभियानलाई वडा तहसम्म विस्तार गरी थप प्रभावकारी बनाउने विषयमा छलफल भएको थियो । विभिन्न जिल्लाका अध्यक्षहरूले पार्टी पुनर्गठन कार्यदलको प्रतिवेदन सार्वजनिक गर्न, स्थानीय तहमा पार्टीको अवस्थाबारे अध्ययन गरी कार्ययोजना बनाउन तथा जनस्तरका समस्या सम्बोधन गर्दै अघि बढ्न आग्रह गरेका थिए ।

सरकारका कामबारे जानकारी

बैठकमा लुम्बिनी प्रदेशका मुख्यमन्त्री चेतनारायण आचार्य तथा एमालेका तर्फबाट प्रदेश सरकारमा सहभागी मन्त्रीहरूले सरकारले गरेका प्रमुख काम र आगामी योजनाबारे जानकारी दिएका थिए ।

रोल्पाको थवाङ, सुनछहरी, लुग्रीलगायत प्रदेशका विभिन्न क्षेत्रमा विपद्का कारण ज्यान गुमाएका परिवारलाई राहत उपलब्ध गराउन, घाइतेको उपचार तथा प्रभावित क्षेत्रको अवस्था सुधारका लागि आवश्यक योजना बनाउन सरकारको ध्यानाकर्षण गराइएको थियो ।

केन्द्रीय सचिव विश्वकर्माको निर्देशन

एमाले केन्द्रीय सचिव तथा लुम्बिनी प्रदेश इन्चार्ज छविलाल विश्वकर्माले पार्टीका निर्णय प्रभावकारी रूपमा कार्यान्वयन गर्न निर्देशन दिएका छन् ।

उनले अन्य प्रदेशको तुलनामा लुम्बिनीमा पार्टीका गतिविधि बढेको, सदस्यता नवीकरणको संख्या पनि वृद्धि भएको तथा केन्द्रीय कार्यक्रम कार्यान्वयनको अवस्था राम्रो रहेको बताए । स्थानीय तथा प्रदेश सरकारसँग समन्वय बढाउँदै पार्टीका गतिविधिलाई थप प्रभावकारी बनाउन उनले निर्देशन दिएका छन् ।

Originally published on abcnews.com.np.