काठमाडौं । नेपाली एथलेट सन्तोषी श्रेष्ठले वर्ल्ड एथलेटिक्स कन्टिनेन्टल टुर (सिल्भर) २०२६ अन्तर्गत महिला पाँच हजार मिटर दौडमा कांस्यपदक जितेकी छन्।

भारतको भुवनेश्वरमा शनिबार भएको प्रतियोगितामा सन्तोषीले पाँच हजार मिटर दूरी १७ मिनेट ३१.७५ सेकेन्डमा पूरा गर्दै तेस्रो स्थान हासिल गरेकी हुन्।

प्रतियोगितामा केन्याकी डिएना वान्जाले स्वर्ण तथा भारतकी भारतीले रजतपदक जितिन्। वान्जाले १५ मिनेट १६.११ सेकेन्डमा दूरी पूरा गर्दा भारतीले १५ मिनेट ४६.४५ सेकेन्डमा दौड पूरा गरिन्।

सोमबहादुरको राष्ट्रिय कीर्तिमान

सोही प्रतियोगिताको पुरुष ८०० मिटर दौडमा नेपालका सोमबहादुर कुमालले राष्ट्रिय कीर्तिमान बनाएका छन्।

त्रिभुवन आर्मी क्लबका कुमालले ८०० मिटर दूरी एक मिनेट ४९.५५ सेकेन्डमा पूरा गर्दै आफ्नै नाममा रहेको पुरानो राष्ट्रिय कीर्तिमान सुधार गरेका हुन्।

यसअघि कुमालले सन् २०१८ मा इन्डोनेसियामा भएको १८औँ एसियाली खेलकुदमा एक मिनेट ५०.२५ सेकेन्डमा ८०० मिटर दूरी पूरा गर्दै राष्ट्रिय कीर्तिमान बनाएका थिए।

एसियाली खेलकुदको तयारी

सन्तोषी श्रेष्ठ र सोमबहादुर कुमाल दुवै जापानको आइची–नागोयामा आगामी महिना आयोजना हुने २०औँ एसियाली खेलकुदका लागि बन्द प्रशिक्षणमा रहेका छन्।

कन्टिनेन्टल टुरमा प्राप्त पदक र राष्ट्रिय कीर्तिमानले उनीहरूको एसियाली खेलकुदको तयारीलाई थप उत्साह प्रदान गरेको छ। दुवै खेलाडीले एसियाली खेलकुदमा उत्कृष्ट प्रदर्शन गर्ने लक्ष्यसहित प्रशिक्षण गरिरहेका छन्।

Originally published on abcnews.com.np.