काठमाडौं । स्पेनिस ला लिगाको नयाँ सिजनमा रियल मड्रिडले विजयी सुरुवात गरेको छ। शनिबार राति भएको खेलमा रियलले इस्पानियोललाई २–१ ले पराजित गरेको हो।

रियलको जितमा जुड बेलिङ्घम र नवआगन्तुक कार्लोस एस्पीले गोल गरे। इस्पानियोलका लागि एलेक्स कालात्राभाले एक गोल फर्काए।

खेलको नवौँ मिनेटमा बेलिङ्घमले गोल गर्दै रियललाई सुरुआती अग्रता दिलाएका थिए। उनले अर्दा गुलरले प्रहार गरेको फ्रिकिकमा हेडमार्फत गोल गरेका हुन्।

इस्पानियोलले ३०औँ मिनेटमा एलेक्स कालात्राभाको गोलमार्फत खेल १–१ को बराबरीमा ल्यायो। त्यसपछि दुवै टोलीले गोलका अवसर सिर्जना गरे पनि निर्धारित समयसम्म थप गोल हुन सकेन।

रियलका प्रशिक्षक जोसे माउरिन्होले दोस्रो हाफमा मार्क कुकुरेला, यान डिओमान्डे, एडुआर्दो कामाभिन्गा, ट्रेन्ट अलेक्ज्यान्डर–आर्नोल्ड र कार्लोस एस्पीलगायत खेलाडीलाई मैदान प्रवेश गराएका थिए।

निर्णायक गोल ९०औँ मिनेटमा एस्पीले गरे। किलियन एम्बाप्पेको प्रयासपछि आएको बललाई एस्पीले गोलमा परिणत गर्दै रियललाई २–१ को जित दिलाए। लेभान्तेबाट आएका एस्पीले रियलका लागि आफ्नो आधिकारिक डेब्यु खेलमै निर्णायक गोल गरेका हुन्।

यो जितसँगै माउरिन्होको रियल मड्रिडमा पुनरागमन पनि विजयी बनेको छ। उनले १३ वर्षपछि फेरि रियलको मुख्य प्रशिक्षकको जिम्मेवारी सम्हालेका हुन्।

रियलले जित हात पारे पनि इस्पानियोलले बलियो प्रदर्शन गर्दै लामो समयसम्म खेल बराबरीमा राखेको थियो। अन्तिम क्षणमा एस्पीले गरेको गोलपछि भने घरेलु टोली पराजित भयो।

Originally published on abcnews.com.np.