काठमाडौं । पानामाको झण्डा बोकेको कार्गो जहाज ‘ओसन विनर’ बंगालको खाडीमा डुब्दा २२ जना बेपत्ता भएका छन्। भारतको ओडिसास्थित पारादीप तटबाट करिब २४० समुद्री माइल अर्थात् ४४४ किलोमिटर टाढा शनिबार जहाज दुर्घटनामा परेको हो।

जहाजमा चालक दलका २४ सदस्य सवार थिए। दुर्घटनापछि दुई जनाको उद्धार गरिएको भए पनि बाँकी २२ जना अझै बेपत्ता रहेको भारतीय तटरक्षक दलले जनाएको छ।

जहाजमा २० चिनियाँ, तीन म्यानमारी र एक बंगलादेशी नागरिक सवार थिए। ‘ओसन विनर’ ओडिसाबाट सिंगापुरतर्फ फलाम बोकेर जाँदै गरेको बताइएको छ।

दुर्घटनापछि भारतीय तटरक्षक दलले खोजी तथा उद्धार कार्य तीव्र बनाएको छ। श्री विजयपुरम, यसअघि पोर्ट ब्लेयरका नामले चिनिने स्थानबाट दुईवटा जहाज घटनास्थलतर्फ पठाइएको तटरक्षक दलका प्रवक्ता कमान्डेन्ट अमित उनियालले जानकारी दिएका छन्।

बेपत्ता चालक दलका सदस्यको खोजीका लागि थप उद्धार टोली परिचालन गरिएको जनाइएको छ।

Originally published on abcnews.com.np.