जाजरकोट । बाढीले बगाएको भेरी करिडोरअन्तर्गत जाजरकोटको नलगाड नगरपालिका–१० र ११ को सीमाक्षेत्र ताक्सुगाडको सडक नौ दिनपछि पुनः सञ्चालनमा आएको छ।

गत साउन २८ गते राति परेको अविरल वर्षापछि ताक्सुगाड खोलामा आएको बाढीले सडक, पुल तथा चारवटा घर बगाउँदा जाजरकोट–डोल्पा सडकखण्ड पूर्ण रूपमा अवरुद्ध भएको थियो। सडक र पुलमा क्षति पुगेपछि जाजरकोटबाट डोल्पातर्फ जाने यातायात सेवा ठप्प भएको थियो।

सडक अवरुद्ध हुँदा यात्रु, स्थानीय बासिन्दा तथा दैनिक उपभोग्य सामग्री बोकेका सवारीसाधन बीच बाटोमै रोकिएका थिए। भेरी करिडोर सडक योजनाले तत्काल मर्मत तथा वैकल्पिक रूपमा यातायात सञ्चालनको काम अघि बढाएपछि आइतबारदेखि सडक खुलाइएको हो। नलगाड नगरपालिकाको समन्वयमा सडक सञ्चालनमा ल्याइएको बताइएको छ।

जाजरकोटका सांसद खड्कबहादुर बुढाले स्थलगत अनुगमन गरी तत्काल वैकल्पिक व्यवस्था गरेर भए पनि सडक सञ्चालन गर्न आग्रह गरिएको बताए।

‘म आफैँ पनि स्थलगत अनुगमनमा पुगेको थिएँ। समयमै वैकल्पिक रूपमा भए पनि सञ्चालनमा ल्याउन आग्रह गरेको थिएँ। आजदेखि सञ्चालनमा आएको छ,’ उनले भने।

सडक खुलेसँगै जाजरकोटबाट डोल्पाको त्रिपुराकोट, छलगाडलगायत क्षेत्रमा जाने सवारीसाधन सञ्चालनमा आएका छन्।

जोखिम भने कायमै

सांसद बुढाका अनुसार ताक्सुगाडमा सडक खुले पनि यातायात पूर्ण रूपमा सुरक्षित भने भइसकेको छैन। खोलामा पानीको बहाव बढेमा सडक पुनः अवरुद्ध हुन सक्ने जोखिम कायमै रहेको उनले बताए।

भेरी करिडोर पूर्ण रूपमा मर्मत भइनसकेको र हाल वैकल्पिक व्यवस्थामार्फत यातायात सञ्चालन गरिएको जनाइएको छ। ताक्सुगाड खोलाको बहाव जोखिमपूर्ण रहेकाले यात्रु तथा चालकलाई सावधानी अपनाउन आग्रह गरिएको छ।

Originally published on abcnews.com.np.