जापानको आइची–नागोयामा हुने २०औँ एसियाडका लागि नेपालको तयारी अन्तिम चरणमा पुगेको छ। राष्ट्रिय खेलकुद परिषद्ले यसपटक २२ खेलमा १ सय ३६ खेलाडी र ३२ प्रशिक्षकसहित १ सय ६८ सदस्यीय नेपाली टोली सहभागी गराउने तयारी गरेको छ।

२२ खेलमा १ सय ३६ खेलाडी

आगामी असोज ३ गतेदेखि सुरु हुने एसियाडमा नेपालबाट महिला ५६ र पुरुष ८० गरी १ सय ३६ खेलाडीले प्रतिस्पर्धा गर्नेछन्।

यो संख्या अघिल्लो संस्करणको तुलनामा ६६ ले कम हो। चीनको हाङजाओमा भएको १९औँ एसियाडमा नेपालबाट २९ खेलमा २ सय ३४ खेलाडी सहभागी भएका थिए।

यसपटक आर्चरी, एथ्लेटिक्स, ब्याडमिन्टन, बक्सिङ, क्यानो स्लालम, क्रिकेट, साइक्लिङ, डान्स एन्ड स्पोर्ट्स, गल्फ, जुडो, कबड्डी, कराते, स्केटबोर्ड, सफ्ट टेनिस, स्क्वास, स्विमिङ, टेबल टेनिस, तेक्वान्दो, टेनिस, महिला भलिबल, रेस्लिङ र वुसुमा नेपाली खेलाडीले प्रतिस्पर्धा गर्नेछन्।

क्रिकेट र कबड्डीमा नेपालको सबैभन्दा ठूलो टोली रहनेछ। क्रिकेटमा १५ तथा महिला र पुरुष कबड्डीमा समान १२ खेलाडी सहभागी हुनेछन्।

नौ खेलका खेलाडीलाई वैदेशिक प्रशिक्षण

एसियाडको तयारीमा रहेका २२ खेलमध्ये नौ खेलका खेलाडीले मात्र वैदेशिक प्रशिक्षणको अवसर पाएका छन्। अन्य खेलका खेलाडी काठमाडौं उपत्यकाभित्र उपलब्ध पूर्वाधार र सीमित स्रोतसाधनमै प्रशिक्षण गरिरहेका छन्।

राष्ट्रिय टोलीको तयारी हेरिरहेका दीपक श्रेष्ठका अनुसार बक्सिङ, कुस्ती, स्विमिङ, टेनिस, कबड्डी र साइक्लिङका खेलाडी भारतमा प्रशिक्षण गरिरहेका छन्। गल्फका खेलाडी दुई फरक देशमा प्रशिक्षणमा छन् भने वुसुको टोलीले चीनमा एक महिना प्रशिक्षण गरेर स्वदेश फर्किसकेको छ।

ई–स्पोर्ट्सका खेलाडी छनोट भएर पनि बाहिर

यसपटक ई–स्पोर्ट्सका खेलाडीले भने एसियाडमा सहभागिता जनाउन नपाउने भएका छन्। छनोट भएर पनि दुई फरक संघबीचको विवादका कारण उनीहरू प्रतियोगिताबाट बाहिरिनुपरेको हो।

पदक जित्ने चुनौती

एसियाडमा नेपालको सहभागिता नियमित भए पनि पदक संख्या भने निकै न्यून छ। सन् १९५१ मा भारतमा भएको पहिलो एसियाडदेखि हालसम्म नेपालले तीन रजत र २३ कांस्य गरी २६ पदक मात्र जितेको छ।

अघिल्लो हाङजाओ एसियाडमा नेपालले दुई पदक जितेको थियो। करातेकी एरिका गुरुङले रजत पदक जित्दा महिला कबड्डी टोलीले कांस्यपदक हासिल गरेको थियो।

एरिकाले व्यक्तिगत स्पर्धामा २५ वर्षपछि नेपाललाई रजत पदक दिलाएकी थिइन्।

तेक्वान्दोबाट सुरु भएको रजतको यात्रा

एसियाडमा नेपालका लागि पहिलो रजत पदक सन् १९९८ मा बैंककमा भएको १३औँ एसियाडमा तेक्वान्दोकी सविता राजभण्डारीले जितेकी थिइन्।

त्यसपछि सन् २०१८ को जकार्ता एसियाडमा प्याराग्लाइडिङको पुरुष टिम क्रसकन्ट्रीमा बिमल अधिकारी, विजय गौतम, सुशील गुरुङ, युकेश चौधरी र विशाल थापाको टोलीले रजत पदक जितेको थियो।

नेपालले विभिन्न संस्करणमा तेक्वान्दो, कराते, बक्सिङ, प्याराग्लाइडिङ र कबड्डीबाट पदक हात पारे पनि अधिकांश खेलमा सहभागितामै सीमित हुँदै आएको छ।

आइची–नागोया एसियाडमा सहभागी खेलाडी र प्रशिक्षकले भने यसपटक विगतको तुलनामा राम्रो प्रदर्शन गर्दै नेपालको पदक संख्या बढाउने लक्ष्य राखेका छन्।

Originally published on abcnews.com.np.