नेपाल स्क्वास र्याकेट संघको आयोजनामा सातदोबाटोस्थित स्क्वास कोर्टमा भएको खेलमा दीपकले बंगलादेशका बरुआ दुर्जयलाई ३–१ को सेटमा पराजित गरे।

दीपकले पहिलो सेट ११–७ ले जिते पनि दोस्रो सेट बरुआले ११–९ ले आफ्नो पक्षमा पारेका थिए। त्यसपछि दीपकले तेस्रो सेट ११–४ र चौथो सेट पनि ११–४ ले जित्दै खेल आफ्नो पक्षमा पारे।

यस्तै, मलेसियाका अबिनाश अनबसुले नेपालका सरोज लामालाई ३–० को सोझो सेटमा पराजित गरे। उनले पहिलो सेट ११–६, दोस्रो ११–३ र तेस्रो सेट ११–४ ले जिते।

श्रीलंकाका नेभिन्दु लक्मनले इटालीका रेन्जो एन्डोर्नोलाई पनि ३–० ले हराए। नेभिन्दुले पहिलो सेट ११–७, दोस्रो ११–५ र तेस्रो ११–६ ले जिते।

आज पाँच खेल

प्रतियोगिताअन्तर्गत शनिबार साँझ विभिन्न खेल हुनेछन्। बेलुकी ५ बजे नेपालका राकेश परियारले श्रीलंकाका एम. वाकिल एम. शमिलसँग तथा बंगलादेशका हसन आबिदले भारतका अनमय रुंग्टासँग प्रतिस्पर्धा गर्नेछन्।

त्यस्तै, नेपालका पसाङ भ्लोनले मलेसियाका नितिश मनिमारन, नेपालकी नैना बहादुर मगरले बेलायतका जोन शार्प तथा नेपालका नम्बर १ खेलाडी अराहान्त केशर सिंहले बंगलादेशका अब्दुल ए. सिक्दर सयेमसँग खेल्नेछन्।

प्रतियोगिता निर्देशक तथा नेपाल स्क्वास र्याकेट संघका महासचिव रुपकदास ताम्राकारले खेल तालिकाबारे जानकारी दिएका हुन्।

१६ खेलाडीको सहभागिता

प्रतियोगितामा नेपालसहित भारत, बंगलादेश, श्रीलंका, मलेसिया र बेलायतका १६ खेलाडी सहभागी छन्। प्रतियोगिता आगामी मंगलबार अर्थात् भदौ ९ गतेसम्म सञ्चालन हुनेछ।

प्रतियोगिताको कुल पुरस्कार राशि १ हजार अमेरिकी डलर रहेको छ। विजेताले ४००, उपविजेताले २००, सेमिफाइनलमा पुग्ने दुई खेलाडीले जनही १०० तथा क्वार्टरफाइनलमा पुग्ने खेलाडीले जनही ५० अमेरिकी डलर प्राप्त गर्नेछन्। विजेता खेलाडीलाई ट्रफी र प्रमाणपत्रसमेत प्रदान गरिने संघका सचिव महेन्द्रलाल महर्जनले जानकारी दिए।

प्रतियोगिताको उद्घाटन प्रतिनिधिसभा सदस्य धनञ्जय रेग्मीले गरेका थिए। उद्घाटन समारोह नेपाल स्क्वास र्याकेट संघका अध्यक्ष ध्रुवबहादुर गुरुङको अध्यक्षतामा सम्पन्न भएको थियो।