काठमाडौं । चलचित्र ‘बुकी’मा समावेश ‘तनमनमा भलिबल’ बोलको गीत सार्वजनिक गरिएको छ । भलिबल खेलप्रतिको समर्पण र खेलमार्फत देश चिनाउने भाव समेटिएको गीत निर्माण पक्षले सार्वजनिक गरेको हो ।

मोहन केसीको शब्द तथा दीपक शर्माको संगीत रहेको गीतमा प्रमोद खरेल र रचना रिमालले स्वर दिएका छन् । गीत भलिबल खेलाडीप्रति समर्पित रहेको निर्माण पक्षले जनाएको छ ।

हिमाली तथा उच्च पहाडी क्षेत्रमा भलिबलप्रतिको आकर्षण र खेलाडीको संघर्षलाई केन्द्रमा राखेर गीतको भिडियो तयार गरिएको छ । भिडियोमा गायक तथा अभिनेता देवेन्द्र बब्लु, अभिनेत्री रोशनी कार्कीलगायत कलाकार देखिएका छन् । भिडियो बागलुङको ढोरपाटन तथा आसपासका क्षेत्रमा छायाङ्कन गरिएको हो ।

विवश कुमार माझी र मोहन केसीको निर्देशनमा निर्माण भएको चलचित्र ‘बुकी’मा सुरक्षा पन्त, देवेन्द्र बब्लु र रोशनी कार्की मुख्य भूमिकामा छन् । चलचित्रमा प्रकाश घिमिरे, लक्ष्मीनाथ तिमल्सिना, घनु जोशी, अनु दाहाल, सन्दिप बाबु लोहनी, निशा बजगाईँलगायत कलाकारको अभिनय छ ।

‘हिमालयन म्युजिकल इभेन्ट म्यानेजमेन्ट एन्ड फिल्मस’को प्रस्तुति रहेको चलचित्रको छायाङ्कन विकास गन्दर्भले गरेका छन् भने सम्पादन भूपेन्द्र अधिकारीले गरेका हुन् ।

Originally published on abcnews.com.np.