काठमाडौं । नेपाल ‘ए’ ले अस्ट्रेलियामा जारी टप एन्ड टी–२० सिरिजमा हारबाट यात्रा सुरु गरेको छ। शुक्रबार डार्विनस्थित मरारा क्रिकेट मैदानमा भएको खेलमा आयोजक नर्दन टेरिटोरी (एनटी) स्ट्राइकसँग नेपाल ‘ए’ आठ विकेटले पराजित भएको हो।

नेपालले दिएको १२३ रनको लक्ष्य एनटी स्ट्राइकले १५ ओभरमै दुई विकेट गुमाएर पूरा गर्‍यो। टोलीको जितमा डाउट्जी हुगेनबोएजेमले अविजित अर्धशतक प्रहार गरे।

उनले ३७ बलमा चार चौका र एक छक्काको सहयोगमा अविजित ५० रन बनाए। जोर्डन सिल्कले पनि ४२ रनमा अविजित रहँदै टोलीलाई सहज जित दिलाए। कप्तान डार्सी सर्टले २३ रनको योगदान गरे।

नेपालका लागि बलिङतर्फ पवन सराफले दुवै विकेट लिए पनि अन्य बलरले एनटीको ब्याटिङलाई रोक्न सकेनन्।

सराफको संघर्षपूर्ण इनिङ्स

त्यसअघि टस हारेर पहिले ब्याटिङको निम्तो पाएको नेपाल ‘ए’ ले निर्धारित २० ओभरमा आठ विकेट गुमाउँदै १२० रन बनाएको थियो।

नेपालको ब्याटिङमा पवन सराफले सर्वाधिक ४१ रनको योगदान गरे। उनले ४९ बल खेल्दै तीन चौका र एक छक्का प्रहार गरे। तर, अन्य ब्याटरले अपेक्षाअनुसार ठूलो स्कोर बनाउन नसक्दा नेपालले प्रतिस्पर्धात्मक लक्ष्य खडा गर्न सकेन।

लोकश बमले १६, नारायण जोशीले १५, कप्तान अनिलकुमार साहले १४, तृतराज दासले १३ तथा राशिद खानले १० रन जोडे।

एनटी स्ट्राइकका हामिश मार्टिनले तीन विकेट लिए। टम मोन्जिस, विलियम ब्लेयर, साम बार्कर र कप्तान डार्सी सर्टले एक–एक विकेट हात पारे।

१२३ रनको तुलनात्मक रूपमा कमजोर लक्ष्य पछ्याएको घरेलु टोलीले सुरुदेखि नै नियन्त्रणमा ब्याटिङ गर्दै १५ ओभरमै खेल आफ्नो पक्षमा पार्‍यो।

नेपाल ‘ए’ अब लगातार दोस्रो खेलमा शनिबार बंगलादेश हाई पर्फमेन्स टोलीसँग प्रतिस्पर्धा गर्नेछ।

Originally published on abcnews.com.np.