मोर्चाको शुक्रबार बसेको बैठकले प्रदेश समन्वय समिति गठन गर्ने निर्णय गरेको जनता समाजवादी पार्टी (जसपा) नेपालका अध्यक्ष उपेन्द्र यादवले जानकारी दिए।

बैठकले आगामी भदौ १० गतेभित्र मधेस प्रदेशका आठवटै जिल्लामा जिल्ला समन्वय समिति गठन गर्ने निर्णयसमेत गरेको छ। संगठन विस्तार तथा जनपरिचालनलाई प्रभावकारी बनाउन मोर्चाले दुईवटा क्षेत्रीय भेला आयोजना गर्ने निर्णय गरेको छ।

निर्णयअनुसार भदौ २७ गते जनकपुरमा सप्तरी, सिरहा, धनुषा, महोत्तरी र सर्लाहीलाई समेटेर संयुक्त भेला आयोजना गरिनेछ। त्यस्तै, रौतहट, बारा र पर्सालाई समेटेर असोज ३ गते वीरगन्जमा बृहत् भेला आयोजना गर्ने निर्णय भएको छ।

बैठकले सिरहाका गणेश यादवको नेपाल प्रहरीको गोली प्रहारबाट भएको मृत्यु तथा बाराकी तीन वर्षीया बालिका गरिमा चौधरीको बलात्कारपछि हत्या भएको घटनाप्रति दुःख व्यक्त गर्दै शोक प्रस्ताव पारित गरेको छ।

मोर्चाले दुवै घटनाका पीडित परिवारलाई तत्काल न्याय र उचित क्षतिपूर्ति उपलब्ध गराउन तथा घटनामा संलग्न दोषीमाथि कडा कानुनी कारबाही गर्न सरकारसँग माग गरेको छ।

बैठकले मधेस प्रदेशका आठवटै जिल्लामा जिल्ला समन्वय समिति गठनको जिम्मेवारीसमेत मोर्चामा आबद्ध घटक दलहरूबीच बाँडफाँट गरेको छ। मोर्चाले आगामी दिनमा संगठन विस्तार र जनपरिचालनलाई तीव्रता दिने जनाएको छ।