देउवाले शुक्रबार दिउँसो वारेसमार्फत सर्वोच्चमा रिट पेस गरेका थिए। तर, सर्वोच्चले रिट अध्ययन गर्ने क्रममा मुद्दा नम्बरलगायत केही विषयमा त्रुटि देखिएपछि दर्ता हुनुअघि नै फिर्ता लगिएको हो।

सर्वोच्च अदालतका प्रवक्ता अर्जुन कोइरालाका अनुसार रिट दर्ता भइसकेको थिएन।

‘रिट आएको थियो, हामी अध्ययनकै क्रममा थियौँ। दर्ता भइसकेको थिएन। पछि उहाँहरूले सच्याएर ल्याउँछौँ भन्दै फिर्ता लिएर जानुभएको छ। अब सोमबार ल्याउनुहुन्छ होला,’ कोइरालाले भने।

देउवाले पेस गरेको रिटमा कांग्रेसको १५औँ महाधिवेशनका सम्पूर्ण प्रक्रिया रोक्न माग गरिएको थियो।

गगन नेतृत्वको आधिकारिकता पुनरावलोकनको माग

देउवा पक्षले कांग्रेसको आधिकारिकता गगन थापा नेतृत्वलाई दिने सर्वोच्च अदालतको फैसलाको पुनरावलोकनका लागि निस्सा प्रदान भइसकेकाले महाधिवेशन प्रक्रिया रोक्नुपर्ने माग गर्दै आएको छ।

देउवा र पूर्वउपसभापति पूर्णबहादुर खड्काले विशेष महाधिवेशनबाट चुनिएको नेतृत्व आधिकारिक नभएको तथा आफूहरू नै पार्टीको आधिकारिक नेतृत्व रहेको दाबी गर्दै आएका छन्।

निर्वाचन आयोगले गगन थापा नेतृत्वको समितिलाई कांग्रेसको आधिकारिकता दिएको थियो। उक्त निर्णय सर्वोच्च अदालतले समेत सदर गरेको थियो। सो फैसलाविरुद्ध देउवा र खड्काले पुनरावलोकन निवेदन दिएपछि सर्वोच्चले निस्सा प्रदान गरेको छ।

महाधिवेशनको प्रक्रिया रोक्न अदालत पुगे देउवा

गगन थापा नेतृत्वले १५औँ महाधिवेशनको कार्यतालिका सार्वजनिक गर्दै प्रक्रिया अघि बढाएपछि देउवा त्यसलाई रोक्न सर्वोच्च अदालत पुगेका हुन्।

शुक्रबार पेस गरिएको रिट दर्ता हुन नसकेपछि आवश्यक त्रुटि सच्याएर सोमबार पुनः सर्वोच्चमा पेस गर्ने तयारी गरिएको छ।

पूर्वउपसभापति पूर्णबहादुर खड्काले भने हालसम्म सर्वोच्चमा रिट दायर गरेका छैनन्। उनी आफू कानुनी परामर्शमा रहेको बताउँदै आएका छन्।