शुक्रबार डार्विनस्थित मरारा क्रिकेट मैदानमा नेपाल ‘ए’ले दिएको १ सय २३ रनको लक्ष्य नर्दन टेरिटरीले १५ ओभरमै २ विकेट गुमाएर पूरा गर्‍यो।

घरेलु टोलीको जितमा डाउट्जी होगेनबुर्जम र जोर्डन शिल्कले तेस्रो विकेटका लागि ८४ रनको अविजित साझेदारी गरे। डाउट्जी ५० रन र जोर्डन ४२ रनमा अविजित रहे।

नर्दन टेरिटरीका कप्तान डार्सी सर्ट २३ रनमा पवन सर्राफको बलमा कुशल मल्लबाट क्याच आउट भए। जागा कोडुरु ८ रनमा कपनको बलमा तृतराज दासबाट क्याच आउट भएका थिए। नेपालका लागि पवन सर्राफले २ विकेट लिए।

त्यसअघि टस हारेर पहिले ब्याटिङ गरेको नेपाल ‘ए’ले निर्धारित २० ओभरमा ८ विकेट गुमाएर १ सय २२ रन बनाएको थियो।

नेपालका लागि पवन सर्राफले सर्वाधिक ४१ रन बनाए। उनले ४९ बलमा ३ चौका र १ छक्का प्रहार गरे।

लोकेश बमले १३ बलमा १६, नारायण जोशीले ८ बलमा १५ र तृतराज दासले १३ रन बनाए। कप्तान अनिल शाह ९ रनमा आउट भए भने कुशल मल्लले ९ रन बनाए। रासिद खानले १० रनको योगदान दिए। ओपनर कुशल भुर्तेल भने खाता नखोल्दै पेभेलियन फर्किए।

नर्दन टेरिटरीका हामिस मार्टिनले १९ रन खर्चेर ३ विकेट लिए। टोम मेन्डिज, विलियम ब्लाएर, डार्सी सर्ट र साम बार्करले समान १–१ विकेट लिए।

सिरिजको दोस्रो खेलमा नेपाल ‘ए’ले शनिबार बंगलादेशसँग प्रतिस्पर्धा गर्नेछ। त्यसपछि सोमबार हरिकेन्स, बुधबार एक्ट कमिट्स, बिहीबार किंग्समेन र शनिबार भिक्टोरियासँग खेल्ने तालिका रहेको छ।